MGA BIGATIN SA PBA D-LEAGUE, TUNGHAYAN SA VALENTINES' DAY

MAGSASANIB-PUWERSA ang Enderun Colleges at FamilyMart sa PBA D-League Season 2019 na nakatakdang magsimula sa Pebrero 14 sa Ynares Sports Arena. Isa sa mga umuusbong na koponan ng kolehiyo, ang paglahok ng paaralan ay tugma sa kanilang programa na padaanin ang kanilang mga mag-aaral sa pagsasanay o internship bago sila magtapos.

Noong 2018, nakamit ng Enderun ang Second Place sa dalawa nilang pangunahing liga – ang National Athletic Association of Schools, Colleges and Universities (NAASCU) at Men’s National Collegiate Athletic Association (MNCAA). Inamin ni Coach Pipo Noundou na talagang kulang ang karanasan ng kanyang manlalaro at ang pagsali sa D-League ay malaking tulong para malunasan ang suliranin na ito.

Pangungunahan ang FamilyMart-Enderun ni kapitan Mark Joseph Nunez, shooter Valandre Chauca, sentro Colince Wabo Kaptue at John Arthur Vidal, ang Most Valuable Player ng MNCAA. Ang iba pang bubuo ng koponan ay mga guwardiyang sina Michael de la Cruz at Klyve Dungan, mga forward na sina Mark Javen Gatdula, Joaquin Mariano, Edward Oebanda, Emmanuel Maagdenberg, Austin Veloso at Francisco Tancioco at sentro Francis Sacundo.

Para lalong lumakas ang koponan, kinuha ni team manager Paolo Bugia ang ex-PBA player na sina Alfonzo Gotladera at Marvin Hayes at si Jose Mari Presbitero ng San Beda University. Ganado ngayon sina Gotladera at Hayes dahil nais nila gamitin itong susi sa kanilang pagbalik muli sa PBA. “At Enderun, our students undergo internship either here or abroad wherein they actually work and if they do well, they are eventually absorbed by the company,” wika ni Enderun President Dr. Edgardo P. Rodriguez.