Kahit wala pang direktibang pagbabanta | Full security alert sa Metro Manila, kasado na!
‘IKA nga nila, kailangang advance tayong mag-isip, hindi lang sa sarili nating buhay kundi para sa ikagaganda ng ating bansa.
Kaya kasunod ng nangyaring pagpapasabog sa Jolo, Sulu na nakalulungkot dahil marami ang namatay ng walang kalaban-laban ay nagpairal na ng full security alert ang Philippine National Police (PNP) sa Metro Manila kahit wala pang natatanggap na direktang pagbabanta ang kapulisan.
Ayon kay National Capital Region Police Office (NCRPO) Director General Guillermo Eleazar, layunin nilang paigtingin ang checkpoint operation at intelligence gatherings upang mas masiguro ang seguridad ng publiko laban sa kapahamakan, lalo na at nalalapit na rin ang halalan.
Kaya bilang mamamayan, dapat marunong din tayong sumunod at makipagtulungan upang maiwasan ang problema at abala, kung may checkpoint, eh, gawin na lang at huwag ng kung anu-ano ang sinasabi.
Gayunman, nanawagan ang PNP sa publiko na asahan ang maraming bilang ng mga pulis sa mga matataong lugar.
Samantala, umiwas din sa mga pulis na inaabuso ang nagaganap na checkpoints kung saan nagagawa pang mangotong, ‘yun lang!
Kaya ang paalala natin sa lahat, huwag lang maging handa, maging matalino rin laban sa mga masasamang banta!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments