After ng pagbomba sa cathedral habang may misa, 20 patay 117 grabe | MAGSISIMBA KAKAPKAPAN

MATAPOS ang pagbomba sa Our Lady of Mt. Carmel Cathedral sa Jolo, Sulu habang may misa, kung saan 20 ang namatay at 117 ang sugatan, may mga humirit na magsagawa ng matinding seguridad sa lahat ng Simbahan.

Dapat umanong magkaroon ng mga security guard ang bawat Simbahan at kung maaari ay kapkapan ang mga nagsisimba upang matiyak na walang masamang-loob na makakapuslit tulad nang nangyari sa Sulu.

Samantala, personal na binisita kahapon ni Pangulong Rodrigo Duterte ang nasabing cathedral.

Alas-2:15 ng hapon nang dumating ang pangulo kung saan ininspeksiyon nito ang cathedral at umalis alas-5:35 ng hapon matapos makiramay sa mga biktima ng pagsabog.

Batay sa larawan na ipinadala ni dating Special Assistant to the President Christopher ‘Bong’ Go, bukod sa kanya kasama ng pangulo ang anak na sina Davao City Mayor Sara Duterte, Defense Secretary Delfin Lorenzana, Interior Secretary Eduardo Año, National Security Adviser Hermogenes Esperon, Jr. at Philippine National Police Chief Oscar Albayalde.

Makikita rin ang pangulo na nakatayo habang katabi ang mga kabaong ng mga sundalo habang kinakausap si Western Mindanao Command chief Arnel dela Vega.

Binisita rin ni P-Duterte ang mga sugatang sundalo at sibilyan.