Panawagan sa mga kinauukulan, mga grupong naglalabas ng pekeng pre-election surveys, hulihin!
NGAYONG nalalapit na ang 2019 Midterm Elections, hindi maiiwasan ang kumpetisyon dahil maraming kandidato ang nagpapabango ng kani-kanilang mga pangalan para makakuha nang mataas na boto na kanilang inaasam-asam upang magkaroon sila ng puwesto sa gobyerno.
Kaya naman, nagbabala ang Social Weather Stations (SWS) sa lahat ng mamamayan hinggil sa pekeng pre-election surveys na nagkalat na sa kasalukuyan.
Ayon sa SWS, kaya umano maraming surveys ang isinasagawa ng iba’t ibang grupo ay dahil paparating na ang eleksiyon kung saan kinakailangan nating mag-ingat at maging matalino, lalo na at marami sa mga grupong ito ay hindi lehitimo at maaari lang gamitin sa kung anu-ano ang impormasyong maibabahagi ng mga tao.
Kung gayun, bakit hindi ito hulihin upang hindi na sila makapanggulo?
Samantala, madalas nating pinagbabasehan ang mga survey para makakuha tayo ng impormasyon hinggil sa mga kandidatong maaari nating iboto o sa iba pang mga bagay, pero ang paalala natin sa publiko, huwag lang tayong dumepende sa mga ito, magkaroon tayo ng sariling opinyon at obserbasyon nang sa gayun ay mas totoo at maganda ang ating maging desisyon at hindi tayo magsisi sa huli ‘pag nagkataong, palpak ‘yung mga kanditatong ibinoto natin.
Sa ngayon, usung-uso na ang salitang “legit”, kaya makisabay tayo sa agos at umiwas na tayo sa “fake news”!
Gayundin, para mas totoo, hindi bias at walang halong panloloko ang mga makukuha nating impormasyon tayo na mismo ang gumawa ng paraan para maging maalam sa mga nangyayari sa bansa.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments