DCC MASTER OF THE TABLE, MAAANGKIN BA NG PINOY?

APAT na panalo sa apat na laro ang babala na pinakawalan nina Dennis “Robocop” Orcullo at Zorren James “Dodong Diamond” Aranas para ipakita kung gaano sila kaseryoso sa pagdodomina ng pinakamalaking professional billiards tournament na tinaguriang 2019 Derby City Classic (DCC) sa Southern Indiana.

Sinagasaan ni Orcullo, no. 2 cue artist sa 2018 AZBilliards Moneyboard at overall titlist sa torneo noong 2014 at 2017, sina Jason Brattin, Calvin Gulley, Casey Pierson at Marshall Beach sa 9-Ball Banks na event tungo sa maayos na arangkada sa layuning muling maging DCC Master of the Table sa sagupaang nasa pang 20 edisyon na ngayong taong ito.

Hindi rin nagpadaig si Aranas at pinatumba niya sina Clennis Nichols, Alvin Carroll, Bill Trimble at Joey Korsiak sa kompetisyong umakit ng mahigit 500 manunumbok na umaasinta sa top purse na $10,000.

Nakabuntot ang pangkalahatang kampeon ng 2018 na si Francisco “Django” Bustamante at ang two-time titlist na si Alex “The Lion” Pagulayan dahil may malinis pa rin silang kartada pagkatapos ng tatlong salang sa mesa.

Dinaig ni Bustamante, ang alamat mula sa Tarlac, sina Michael Eck, Craig VandeWettering at Jeff Abernathy para sa walang mantsang rekord habang nabiktima ng husay ni Pagulayan sina Jeff Freeman, Bader Al-Awadhi at Marc Vidal.