‘Pag may kalamidad o emergency —DILG | LOCAL OFFICIALS BAWAL BUMIYAHE

HINDI na papayagan ng Department of Interior and Local Government (DILG) ang mga lokal na opisyal na magbiyahe sa panahon na may kalamidad o iba pang emergency.

Sa ipinalabas na memorandum ni Interior and Local Government Secretary Eduardo Año, ipinawawalambisa nito ang lahat ng aprubado nang biyahe at leave of absence ng mga lokal na opisyal sakaling may maganap na natural o man-made disaster.

Diin ni DILG Assistant Secretary Jonathan Malaya, layon ng direktiba na matiyak ang presensiya ng mga local chief executive sa panahon ng kalamidad lalo na’t bahagi ito ng kanilang mandato.

“As we are guided by law, we will exercise it to its full extent to ensure that local chief executives are where they are expected to be in times of disaster or calamities,” ani Malaya.

Kamakailan ay naendorso na ng DILG sa Office of the Ombudsman ang mga kasong administratibo laban sa limang alkalde sa Hilagang Luzon na absent o missing-in-action nang manalasa ang Bagyong Ompong noong Setyembre ng nakaraang taon.

Mayroon ding anim na iba pa ang napagalitan kasunod ng imbestigasyon ng DILG.