Negosyante binaril sa batok, tigok

DEDO ang 46-anyos na negosyente matapos barilin sa batok ng isa sa dalawang hindi kilalang riding-in-tandem sa Malabon City, kamakalawa ng hapon.

Dead-on-the-spot sanhi ng tinamong tama ng bala sa batok ang biktimang si Rolando Ruado, 46, ng Bgy. Catmon.

Ayon kina SPO1 Alexander dela Cruz at PO3 Roldan Angeles, alas-3:30 ng hapon, sakay ang biktima sa kanyang minamanehong service tricycle na kinakargahan ng karne ng baboy kasama ang anim na menor-de-edad habang binabagtas ang kahabaan ng M. H. del Pilar, Bgy. Maysilo nang harangin sila ng mga suspek na sakay ng motorsiklo.

Bumunot ng cal. 45 baril ang nakaangkas at binaril sa batok ang biktima sa harap ng kanyang mga kasamang menor-de-edad bago nagsitakas.

Sa pahayag sa pulisya ng asawa ng biktima na si Josephine, wala siyang alam na kaaway ang kanyang mister maliban sa isang SPO2 Percival Baldemoro, nakatalaga sa Navotas Police na nakatalo ng biktima noong December 31, 2018.

Tiwala naman si Malabon Police Chief Sr. Supt. Jessie Tamayao na handa si SPO2 Baldemoro na isailalim sa mga katanungan upang i-clear ang kanyang pangalan kung talagang hindi ito sangkot sa insidente matapos itong banggitin ng asawa ng biktima.