Tulak patay sa sementeryo

BULAGTA ang hinihinalang drug pusher matapos umanong manlaban sa mga tauhan ng Manila Police District (MPD) sa isinagawang buy-bust operation, kamakalawa ng hapon sa loob ng Manila North Ceme­tery sa Sta. Cruz, Manila.

Naisugod pa sa Chinese General Hospital ang suspek na si Jarizz Eusebio alyas Nimar, 24, miyembro ng Commando Gang, residente ng Don Bosco, Tondo, Manila.

Batay sa imbestigasyon, alas-4:45 ng hapon nang magkasa ng buy-bust operation ang mga tauhan ng Station Drug Enforcement Team at Police Community Precincts (PCPs) ng Alvarez, Plaza Miranda at Blumentritt, na sakop ng Sta. Cruz Police Station 3, laban sa suspek sa 9th Street, Avenue B, Manila North Cemetery, Blumentritt Street, Sta. Cruz.

Nakatanggap umano ng impormasyon ang mga pulis kaugnay sa iligal na gawain ni Eusebio.

Nagpanggap naman na poseur-buyer si PO1 John Barateta at bumili ng P200 shabu mula sa suspek at nang maisagawa ang transaksiyon, sumignal ito sa mga kasamahan para arestuhin na ang suspek.

Nakahalata ang suspek na aarestuhin ng mga pulis kaya bumunot ito ng baril at pinaputukan ang mga pulis pero nagmintis. Gumanti naman si PO1 Barateta at pinagbabaril ang suspek sa katawan.

Narekober ng mga pulis mula sa suspek ang dalawang sachets ng hinihinalang shabu, P200 buy-bust money at kalibre .38 revolver na Smith and Wesson.