Malaysian, timbog sa pekeng PH passport

ARESTADO sa Ninoy Aquino International Air­port (NAIA) Immigration officer ang isang Malaysian na­tional matapos gumamit ng pekeng Philippine passport.

Kinilala ni Immigration Port Operations Chief Grif­ton Medina, ang pasahero na si Toong Yuen Chin, 36, nagtangkang umalis noong Enero 11 subalit, na-intercept sa NAIA Terminal 3 at pasa­kay ng Air Asia Flight patu­ngong Kuala Lumpur, Ma­laysia.

Napag-alaman na ang Philippine passport na gamit ng nasabing dayuhan ay na­kapangalan sa isang Jacky Cruz.

Naghinala ang opisyal ng Immigration nang hindi mabasa ng kanilang machine kaya roon na siya inimbes­tigahan at umamin naman sa tunay na pagkatao nito.

Sinasabing sadyang han­da ang dayuhan sakaling usi­sain siya dahil sa mga dala nitong documents kabilang na ang PhilHealth card at birth certificate na nakasaad na siya ay isinilang sa Sta. Ana, Manila.

Ikinulong sa Immigration detention cell sa Bicutan, Ta­guig ang suspek habang ini­hahanda ang deportation proceeding laban sa dayu­han.