LIMANG PINOY, SASABAK SA PACQUIAO-BRONER FIGHT

@ringstarboxing

LIMANG Pinoy, kabilang si WBA welterweight champion Sen. Manny Pacquiao ang sasabak sa 9-fight, 82-round card sa MGM Grand Garden Arena sa Las Vegas sa Linggo.

Headline ng naturang laban si Pacquiao para sa una niyang pagdepensa ng korona laban kay four-time world champion Adrien “The Problem” Broner ng Cincinnati. Ang iba pang Pinoy sa blockbuster program ay sina interim WBA featherweight ruler Jhack Tepora na magtatanggol ng korona kontra dating WBC superbantamweight king Hugo Ruiz ng Mexico sa isang 12-rounder, sasagupa si Rey Perez kay Australia’s unbeaten George Kambosos, Jr. para sa lightweight 8-rounder, habang si Genesis Libranza ay haharap kay Nicaragua’s Carlos Buitrago sa isang flyweight 8-rounder at si Jayar Inson kontra Texan Jonathan Steele para sa welterweight 8-rounder.

Unang salta ito ni Pacman sa US mula nang talunin si Jessie Vargas sa Las Vegas noong Nob. 2016. Muling nakatrabaho si Hall-of-Fame trainer Freddie Roach mula nang mawala ito sa team Pacquiao nang tigpasin ng icon si Lucas Matthysse ng Argentina para sa WBA crown sa Kuala Lumpur noong Hulyo,2018. Aagapay sa corner ni Pacman si Roach kasama si Buboy Fernandez sa mga timeouts at rounds. Ang cutman ay si Dave Martinez, ang California Boxing Hall of Famer na isang Vietnam War medic. (MC)