Kapalit ng birth certificate ng anak — Kamara | MGA MAGULANG, OBLIGADONG MAGTANIM NG 2 PUNO KADA BEY

PINAGTIBAY na ng Kamara sa ikatlo at huling pagbasa sa plenaryo ang panukalang-batas na la­yong obligahin ang mga magulang na magtanim ng dalawang puno sa bawat sanggol na isisi­lang sa kanilang pamilya.

Sa botong 208 at wa­lang pagtutol, lusot na ang House Bill 8727 o Family Tree Plan­ting Act na layong maka­pag­takda ang pamahalaan ng mga polisiya na poprotekta sa karapatan ng mga Pilipino na magkaroon ng balanse at malusog na ekolohiya.

Sakaling tuluyang ma­ging batas, itatanim ng mag-asawa ang puno sa kanilang bakuran o sa lugar na itata­laga ng kani­lang Barangay Council na inaprubahan din ng De­partment of Environ­ment and Natural Resources (DENR).

Nakasaad pa sa panu­kala na ibibigay lamang ng city o Municipal Local Civil Re­gistry ang Certi­ficate of Live Birth ng bata kapag naka­pagtanim na ng puno ang mga magu­lang nito.

Aprubado na rin sa ple­naryo sa botong 208 at wa­lang pagtutol ang House Bill 8728 o Gradua­tion Legacy for the Envi­ron­ment Act na nag-oob­liga sa lahat ng mga es­tudyanteng magtatapos sa elementarya, high school at kolehiyo na magtanim ng hindi bababa sa 10 puno bi­lang pre-re­quisite para maka-gra­duate.

Sa ilalim ng panukala, ang mga puno ay kaila­ngang maitanim sa kahit alin sa mga sumusunod: mga forest land, bakawan at iba pang protec­ted areas; mga ances­tral do­main; mga civil at mi­litary reservation; sa mga lung­sod, gayundin sa mga hindi na aktibo at abando­nadong mi­nahan at iba pang naaangkop na lu­pain.

Kailangan umano na ang mga punong itatanim ay naaangkop sa lokas­yon, kli­ma at topograpiya ng lugar.