IM QUIZON, MORDIDO, SAN DIEGO, CONCIO AT ARAGONES SA BOYI CUP

MATAPOS ang Asian Chess Championships sa ‘Pinas noong Disyembre, muling mapapalaban ang mga Pinoy sa mga bigatin sa 3rd Boyi Cup Youth China International Chess Championship sa Enero 19 sa lalawigan ng Harbin.

Kakampanya para sa ‘Pinas sina newly installed International Masters Daniel Quizon at Kylene Joy Mordido kasama sina Jerilyn San Diego, Michael Concio at Jerome Angelo Aragones.

Makikipagtagisan sila ng talas nang isipan sa 64 black and white chessboard sa torneo hanggang Enero 24.

Optimistiko si coach IM Roel Abelgas na maganda ang ipakikita ng mga Pinoy dahil naghanda sila nang husto at ayaw nilang mabigo sa unang international chess competition ngayong “Year of the Pig.” Kamakailan pumangalawa si Quizon na may 7.5 total points kay eventual champion Bai Jinshi ng China na may 8.5 points sa katatapos na China Youth Chess International Chess Championship.

Ang paglahok ng mga Pinoy ay sinuportahan ng National Chess Federation of the Philippines. (Clyde Mariano)