Mamahaling gamit, cash tinangay | BEBOT NA TIRADOR NG CLINIC, GUMAGALA

TINATAYANG aabot sa P300,000 ang nakulimbat ng isang babaeng miyembro ng umano’y Salisi Gang, ang mga tseke, mamahaling gamit, cash, gadget at iba pa sa isang negosyante sa loob ng clinic sa Muntinlupa City, kamakalawa ng hapon.

Halos manlumo nang dumulog sa himpilan ng Muntinlupa City Police ang biktimang si Suzette Lavin, 44, upang ireklamo ang nangyaring pagnanakaw.

Patuloy pang inaalam ng pulisya ang pagkakakilanlan ng babaeng suspek. Base sa ulat, alas-5:44 ng hapon nang mangyari ang pananalisi sa loob ng Medicard Clinic Wellness Lane, sa ikatlong palapag ng Festival Mall, Bgy. Alabang, Muntinlupa City.

Sinasabing nalingat sandali ang biktima at bigla na lamang nawala ang assorted checks na nagkakahalagang P150,000; bag na halagang P100,000; P20,000 cash; iPad na P13,000; bank deposit slip para sa bayad sa AOFOG na P15,800, mga ATM card, credit card, flash drive at receipt booklet.

Sinusuri naman ng awtoridad ang kuha ng CCTV camera sa lugar upang matukoy ang pagkakakilanlan ng babae at kung ito ay may mga kasabwat.