Tulak utas sa parak

DEDO ang drug suspect na source umano ng iligal na droga sa Bgy. Gen. T. De Leon matapos mauwi sa barilan ang ikinasang buy-bust operation habang arestado naman ang kanyang kasama sa Valenzuela City, kahapon ng madaling-araw.

Dead-on-arrival sa Valenzuela Medical Center sanhi ng tama ng bala sa katawan si Roger Pennelleri alyas Mayor, ng Sitio Cabatuhan, Bgy. Gen. T. De Leon habang arestado naman ang kasama nito na si Anthony Carvajal, 33.

Ayon kay Valenzuela Police Chief Senior Supt. David Nicolas Poklay, alas-2:30 ng madaling- araw nang isagawa ng mga operatiba ng SDEU ang buy-bust operation kontra sa mga suspek sa Sitio Cabatuhan kung saan nagpanggap na poseur-buyer si PO1 Maverick Jake Perez at nagawang makabili sa mga suspek ng isang sachet ng shabu kapalit ng P300 marked money.

Nang magbigay ng signal si PO1 Perez sa kanyang mga kabaro, agad lumusob ang back-up na mga operatiba subalit, napansin sila ni Pennelleri kaya naglabas ito ng baril at pinaputukan ang mga ito na naging dahilan upang gumanti si SPO1 Roberto Santillan.

Ani Senior Supt. Poklay, narekober sa nasawi ang cal. 38 revolver, 13 transparent plastic sachets na naglalaman ng hindi pa matukoy na halaga ng shabu, buy-bust money at cash na pinaniniwalaang napagbentahan ng droga.