DE LIANO, UNA NA, D-LEAGUE DRAFT, DARAGSAIN PA NG 153 PLAYERS

KABUUANG isang daan at limampu’t tatlong (153) mga manlalaro ang lalahok sa gaganaping 2019 PBA D-League Draft.

Nangunguna sa hanay ng mga draft applicants si UAAP Season 81 Mythical Team member at University of the Philippines ace guard Juan Gomez de Liano para sa tau­nang rookie draft na idaraos sa darating na Martes ganap na 3 p.m. sa tanggapan ng PBA sa Libis, Quezon City.

Maliban kay Gomez de Liano,ang ilan sa popular na pointguards na kasali sa draft ay sina dating La Salle skipper Kib Montalbo, Ateneo playmaker Anton Asistio, Jasper Parker ng Far Eastern University, AC Soberano ng San Beda, Arellano guard Ian Alban, Jose Rizal University hotshot Jed Mendoza, at Orlan Wamar ng Centro Escolar University.

Nagsipag-apply din sa draft sina Sean Manganti ng Adamson University, ASEAN Basketball League veteran Joshua Munzon, Clint Doliguez ng San Beda, Dan Wong ng Ateneo, at CESAFI MVP Rey Suerte ng University of the Visayas.

Sa hanay ng big men, nangunguna sa listahan sina Santi Santillan ng La Salle, Warren Bonifacio ng Mapua University at Troy Rike ng National University. May 20 koponan ang mamimili sa mga nabanggit na mga draft hopefuls sa pangunguna ng nagmamay ari ng first pick, ang last season cellar-dweller AMA Online Education. Ang 2019 PBA D-League season ay mag-uumpisa sa Pebrero 14 sa Ynares Sports Arena sa Pasig. (VA)