Mahusay na paglilingkod, ituro sa kabataan!

KUYA WIN GATCHALIAN / WIN TAYO SA EDUKASYON

MATAPAT, may integridad at mahusay na serbisyo ang isa sa mahahalagang pa­nganga­ilangan ng umuunlad na bansa tulad ng Pili­pinas.

Ito ang inaasahang maibigay at ma­tang­­- gap ng isa’t isa, mapapubliko o pri­badong sektor man nagtatrabaho.

Sinisikap ng mga lider o boss ng kum­panya o organisasyon na maging mabu­ting ehemplo ng paglilingkod para maim­plu­wen­siyahan ang mga kabataan na tularan ito kapag dumating na ang panahon na sila ay ma­mumuno o magbibigay ng anumang ser­bisyo.

Sa mga paaralan ay kasama ngayon sa paghahanda ng mga guro ang kaala­man at kasanayan ng junior high school students sa sektor ng paglilingkod kung saan masusing pinag-aaralan ng mga estudyante ang pagka­kaloob ng magan­dang paglilingkod sa mga konsiyumer.

Sa pagtatanong ng ilang guro sa mga estud­yante kung ano ang nais nilang pagtuunan ng pokus pagtuntong ng kolehiyo, pinipili nila ang kursong may kaugnayan sa communi­cations kung saan kabilang sa kurikulum nito ang radio at television broadcasting, internet, print media, advertising, information and communications technology at iba pa.

Nakatutuwang malaman ang kani­lang opinyon na ang ganitong kurso raw ay ma­halaga sa pagpapalago ng ekono­miya ng bansa upang mapabilis ang paki­kipag-ugnayan ng mga tao.

Naniniwala sila na episyenteng serbis­yo ang kailangan upang maayos na ma­ipara­ting sa publiko ang mensahe, im­pormasyon at mga programa mula sa gobyerno.

Ipinaliliwanag ng mga guro sa Tech­nology and Livelihood Education na ang mga Pili­­pino ay kilala sa galing sa linya ng komuni­kasyon kaya napipisil tayo ng mga dayuhan na mag­trabaho sa kani­lang lugar dahil na­kikita nilang handa tayo sa mga gawain at likas na malik­hain.

Bago maging senior high school ang mga estudyante ng Grade 10, mahusay na ipinau­unawa ng kanilang guro ang suliranin tung­kol sa sektor ng pagliling­kod.

Ayon sa De­partment of (DepEd) at Commis­sion of Higher Edu­cation (CHEd), kasama sa mga pagsubok na ito ay maraming mangga­gawang Pinoy ang nangingibang-bansa upang doon magtrabaho.

Kaya nagreresulta ng kakulangan ng mga trabahador o empleyado rito sa atin, mabagal na pag-unlad ng turismo, apektado ang ka­lagayan ng ekonomiya, personal na epekto at iba pa.

Higit sa lahat, ramdam ng mga publiko at pribadong organisasyon dito ang kakulangan sa bilang at kasanayan ng mga manggagawa.

Matapos bigyan ng takdang-aralin, nag­bigay ng ilang suhestiyon ang junior at senior high school students para malutasan ang nasabing isyu.

Una, dapat daw masiguradong may sapat at nakahandang trabaho ang mga bagong gra­duate upang maiwasang mangibang-bansa.

Sumunod ay tangkilikin ang ating mga lokal na produkto at tandaan ang “Filipino First Policy”.

Alisin ang colonial mentality, mag-aral at magsikap nang mabuti upang makatulong sa produksiyon ng bansa.

Higit sa lahat ay magsipag at paunlarin ang sariling mga kasanayan.

Hinihikayat natin ang mga teacher mula junior, senior high school hanggang kolehiyo na patuloy na gabayan sa maliit o malaking paraan ang mga mag-aaral na isaisip at isapuso ang mahusay na serbisyo.

Sa mga kabataan, tandaan na nasa mga kamay ninyo ang kinabukasan ng ating bansa.

Habang nag-aaral pa, alamin na ang susi at pamamaraan sa mabuti at masayang pag­lilingkod sa iba.