Team Duterte na sabit sa katiwalian, pinangalanan | KAWAWA NAMAN KAMI!

IDINEPENSA ng Ma­lacañang ang mga opisyal ng gobyerno na kailangang ipa­alam muna sa mga inirerek­lamo bago ilabas ang panga­lan sa publiko.

“Sa akin, if you ask me as a lawyer, dapat bigyan mo ng pagkakataon din iyong idinidemanda mo. Kasi in my office where we receive complaints against a parti­cular agency or a particular government offi­cial, ang ginagawa namin, pinapa­dala ko doon sa person con­cerned or agency concerned, ‘Oh, may reklamo rito, please respond… kahit anong response mo’,” ani Presidential Spokesman Salvador Panelo sa press briefing sa Malacañang.

“Hindi mo dapat nilala­bas kaagad iyon kasi other­­wise, you might be unneces­sarily maligning a re­putation na walang basis eventually. Kawawa rin naman,” dag­dag pa ni Panelo.

Nauna rito, kinumpirma ng Presidential Anti-Corrup­tion Commission (PACC) na tatlong miyembro ng gabi­nete ni Pangulong Rodrigo Duterte ang kanilang iniim­bestigahan sa isyu ng kati­walian.

Ayon kay Atty. Manue­lito Luna, Commissioner ng PACC, ang tatlong iniimbes­ti­gahang kalihim ay sina TESDA Director General Isidro Lapeña, National Com­mission on Indigenous People Chairperson Atty. Leo­nor Quintayao at Labor Secre­tary Silvestre Bello III.

Ani Luna, nagsimula ang imbestigasyon nila kay Bello matapos silang makatanggap ng reklamo ng ilang may-ari ng agencies laban dito.

Dahil naman aniya sa kontrobersiyal na shabu ship­ment sa BOC ang da­hilan ng imbestigasyon kay Lapeña habang neglect of duty naman ang dahilan ng imbes­tigasyon kay Quinta­yao at dawit din sa imbesti­gasyon ang ilang regio­nal directors ng NCIP.

Dagdag pa ni Luna, tar­get nilang tapusin ang im­bestigasyon sa mga kalihim sa Pebrero na nasimulan na­man noong nakaraang taon. Kapag aniya natapos na ang imbestigasyon, mag­susumite sila ng rekomen­dasyon kay Pangulong Du­terte.

Samantala, pumalag si Bello sa nasabing imbesti­gasyon. Giit ni Bello, unfair para sa kanya na agad isapubliko ang nasabing imbestigasyon lalo’t wala pa naman siyang natatanggap na kopya ng reklamo.

Aniya, dapat ay discreet ang ginagawang imbes­tigasyon ng PACC para maging patas sa lahat. Nalaman lamang umano ni Bello sa news report ang nasabing aksiyon at hindi man lang siya ina­bisuhan.

Kaugnay nito, inihayag ng kalihim na hihilingin niya kay Pangulong Rodrigo Duterte na alisin sa pu­westo si Luna dahil sa pang-aabuso sa kapangyarihan.