PHL AZKALS, MAKAKABAWI KAYA SA TSINA, MATAPOS ILIGPIT NG SOKOR?

DUBAI – Hindi naging madali ang pagbubukas ng kampanya ng Timog Korea sa 2019 AFC Asian Cup kung saan nagtrabaho sila ng husto bago iligpit ang Pilipi­nas, 1-0, sa Al Maktoum Sta­dium Lunes ng gabi. Na­natiling matigas ang depensa ng mga Azkals bago napasok ni forward Hwang Ui Jo ang bola sa ika-67 minuto ng laro.

Kahit nakauna ang kala­ban, hindi pa rin sumuko ang mga Filipino at ilang beses nagtangkang itabla ang laban sa pangunguna ni Javier Patino, Daisuke Sato at Pat­rick Reichelt ngunit kinapos ang kanilang mga sipa. Pinasok ni Coach Sven Go­ran Eriksson si Phil Young­husband sa ika-88 minuto subalit hindi rin ito nakabago sa timpla ng laro.

Nagpakita ng husay si goal­­keeper Michael Falkes­gaard upang maiwasan pang madagdagan ang goal ng mga Koreano. Kahit bigo, umani ng paghanga ang Azkals na unang beses nakalahok sa prestihiyosong torneo laban sa mga Taeguk Warriors na kampeon noong 1956 at 19­60 at ilang beses na kuma­tawan sa Asya sa FIFA World Cup.

Sa ilalim ni Coach Eriks­son, nagpakita ng kakaibang disiplina ang Azkals lalo na sa depensa. Nahirapang makalusot ang mga Koreano sa mga defender tulad ni Sato, Alvaro Silva, Stephan Palla at Luke Woodland.

Sa isa pang laro sa Grupo C na ginanap sa Al Ain, nanalo ang Tsina kontra sa Kyrgyzstan, 2-1, upang makibahagi sa mga Koreano para sa maagang kalama­ngan. Buwenamanong na­ka-goal ang Kyrgyz pero bumawi ang Tsina sa pama­magitan ng dalawang goal sa second half. Susubukan ng Azkals na bumawi sa susu­nod na laro laban sa Tsina nga­yong Bi­yer­nes (Enero 11) sa Mo­ham­med bin Zayed Stadium sa Abu Dhabi. Sisi­pa ang aksyon sa 9:30 p.m., oras sa Pilipinas.