2 PINOY WEIGHTLIFTERS, ANGAT SA 14 NA QUALIFIERS NG 2020 TOKYO

DALAWANG weight­lifters ng Pilipinas ang pasok sa unang la­bing-apat sa bu­ong mun­do kung ang pagba­base­han ay qualifying points na naipon nila para sa 2020 Summer Olympics na ga­ganapin sa Tokyo, Japan.

Ito’y sina Hidilyn Diaz na nasa pang-11 puwesto sa women’s 55 kgs saman­talang si Nestor Colonia ay naka­sampa sa pang-13 baytang sa grupo ng mga nasa 61-kgs. sa ka­lalakihan.

Bagong hamon ang 55-kgs kay Diaz dahil hin­di ito ang kategorya kung saan siya nakakuha ng pi­lak na medalya sa nakara­ang Olympics kundi sa 53 kgs. Pero sa Tokyo, wala na sa eksena ang 53 kgs. na pangkat kaya naob­ligang maghanda ang pi­nakaunang Pinay Olym­pic Silver medalist sa 55 kgs. na bakbakan. May­roong 829.5184 puntos ang Pinay at malayo ito sa produksiyon ng tuma­trangkong Thai na si Su­kanya Srisurat (1,292.6207).

Sa kabilang dako, si Colonia ay may rekord nang 767.8449 puntos pero kagaya rin ng sitwas­yon ni Diaz, ito ay lub­hang nadistansyahan sa nairehistrong 1,159.6569 puntos ni Indonesian Eko Yuli Irawan.

Ang iba pang weight­lifters ng bansa ay nasa labas na ng top 25. Si Jeffrey Garcia na nasa bracket ng 67-kgs ay nakalikom ng 559.1404 puntos para mapako sa pang-26 na posisyon. Ito ay milya-milya sa tangan ng frontrunner mula sa China na si Lijun Chen (1,111.0784 puntos). Pang-38 na puwesto si Elien Rose Perez sa rang­go ng mga nasa 49-kgs. dahil sa 385.0438 puntos lang ang nakuha nito. Isa pang Thai ang nangu­nguna sa grupo (Chayut­tra Pramongkhol, 1,211.7580 puntos).

Base sa patakaran, ma­raming paraan para maka­lahok sa 2020 Olympics. Isa na rito ay kung mapa­pabilang ang isang atleta sa 14 na atleta kada body­weight category at kung makakakuha ng upuan sa pamamagitan ng Interna­tional Weight­liftting Fe­deration (IWF) Absolute Ranking.