GM SO, LALARGA SA PETMALU NA GIBRALTAR CHESSFEST
SASABAK si Pinoy Grandmaster Wesley So sa masters’ bracket ng malupit na 2019 Gibraltar Chess Festival simula sa Enero 22 hanggang 31 na susulong sa loob ng Caleta Hotel ng Gibraltar.
Suot ng dating Philippine Chess king na si So, 25-taong-gulang at may FIDE rating na 2765, ang “3rd seed” tag sa paligsahan sa larangan ng standard chess na tatagal ng 10 rounds at magkakaloob ng gantimpalang £25,000 sa magkakampeon.
Nakaharang sa daanan ng tubong Cavite at world’s no. 11 ang mga super elite at highly rated woodpushers tulad nina GM Maxime Vachiere-Lagrave (pre-tournament favorite at may rating na 2780) ng France, ang nagtatanggol na kampeon at Armenian gem GM Levon Aronian (rating: 2767), ang matinik na speed chesser na si GM Hikaru Nakamura (rating: 2749) ng USA, GM Yangyi Yu (rating: 2764) ng China, pambato ng Czech Republic na si GM David Navara (rating: 2738), GM Arkadij Naiditsch (rating: 2734) mula sa Azerbaijan, Russian GM Nikita Vitiugov (rating: 2720), GM Liem Quang Le (rating: 2714) ng Vietnam, si Ukrainian GM Vassily Ivanchuk (rating: 2713), English ace GM Michael Adams (rating: 2701) at GM Ivan Cheparinov (rating: 2691) ng Georgia.
Bukod sa kanila, may 232 iba pang chessers ang nasa listahan ng mga kalahok mula sa iba’t-ibang bansa at gustong maging bahagi ng winners’ circle na may nakalaan ding £20,000 para sa papangalawa at £15,000 sa magsasara ng podium ng kompetisyong gaganapin sa pang 17 pagkakataon at itinuturing na isa sa pinakamalakas na open tournament sa buong daigdig.
Maliban sa bakbakang masters, may apat na iba pang kategorya: Challengers A (52 entries), Challengers B (58 entries), Amateur A (60 entries) at Amateur B (59 entries).
Comments