BOWLERS NI NEPOMUCENO, BABAWI SA 30TH SEA GAMES

“BABAWI kami!” Ito ang sinabi ni bowling coach Rafael Nepomuceno at ayon sa kanya ay palaban at determinado ang mga Pinoy na manalo at muling kunin ang tiwala at paghanga ng foreign counterparts noong kapanahunan niya kasama sina Lita de la Rosa, Bong Coo, Arianne Cerdena, Ollie Ongtawco, Rene Reyes, at Del Garcia.

Hindi kasi naging maganda ang performance ng mga Pinoy sa dalawang nagdaang Southeast Asian Games sa Singapore at Malaysia ganoon din sa dalawang Asian Games sa South Korea at Indonesia.

Nais ni Nepomuceno na ibalik ang dangal ng bowling sa 2019 30th SEA Games na idaraos sa ‘Pinas upang bigyan ng kasiyahan ang mga kababayang manonood kontra sa mga bigatin sa rehiyon. “We cannot afford to lose in the present of our countrymen. We will do our very best to win and bring back the glory years of bowling once upon a time Filipinos are idolized and respective because of their god-given talents in bowling,” sabi ng four-time World Cup champion.

Matapos magretiro ay kinuha si Nepomuceno ng Philippine Bowling Federation upang hasain at pagalingin ang bowlers kasama sina dating Asian Masters champion Engelberto “Biboy” Rivera at Jojo Canare.

“We will select the best and the finest bowlers to ensure success,” ani Nepomuceno na kamakailan ay ginawaran ng parangal bilang ‘Hall of Famer” kasama sina track legend Lydia de Vega-Mercado, world boxing champion Erbito Salavarria at basketball Olympian Ambrosio Padilla.

Kamakailan lumahok ang mga Pinoy sa World Men Bowling Championship sa Hong Kong na nilahukan ng bowlers mula sa mahigit 100 mga bansa bilang paghahanda sa SEAG. Kasama sa aspirants sina reigning World Cup champion Krizzha Lyn Tabora, Kenneth Chua, Angelo Kenzo Umali, Merwin Tan, Jomar Jumapao, Raoul Miranda, Enzo Hernandez.