2 PA SA GUNMEN NI BATOCABE, SUMUKO

DALAWA pa sa itinu­turong gunmen sa pagpatay kay Ako Bicol Partylist Re­presentative Rodel Batocabe at sa security aide nito na si SPO2 Orlando Diaz ang sumuko na sa pulisya.

Sa ngayon, anim na sa mga itinuturong mga sang­kot sa krimen ang nasa kos­tudiya na ng Philippine Na­tional Police (PNP).

Ayon kay PNP Chief Di­rector General Oscar Alba­yalde, Biyernes ng gabi nang sumuko ang dating miyem­bro ng New People’s Army (NPA) na si Rolando Ari­mando at ang Cafgu mem­ber na si Danilo Muella.

Unang sumuko si Ari­mando sa Provincial Police Office ng Sorsogon habang si Muella ay lumutang sa Albay Provincial Police Of­fice.

Bukod kina Arimando at Muella, lumantad na rin sa Taguig City police para su­muko si Jaywin Bador araw din ng Biyernes.

Nasa kostudiya na ng PNP-Intelligence Group si Bador. Sinabi ni Bador na agad siyang lumuwas ng Maynila para magtago ilang oras nang maganap ang pamamaslang kay Batocabe.

Si Bador ay nagsilbing lookout at driver ng isa sa mga motorsiklo na ginamit sa pagtakas ng mga gunmen.

Nauna rito, sumuko sa mga awtoridad si Christo­pher Naval na dating mi­yembro ng Philippine Army at ang Cafgu member na si Emmanuel Rosello.

Si Naval ay sinasabing miyembro ng security team ni Daraga, Albay Mayor Carl­wyn Baldo na siya na­mang itinuturong utak sa naganap na pamamaslang.

Naunang sumuko sa mga opisyal ng Philippine Army sa Sorsogon ang da­ting mi­yembro rin ng NPA na si Henry Yuson.

Si Yuson ang naunang nagkumpirma na si Baldo ang mastermind sa pagpa­tay sa mambabatas.

Lumutang ang mga pa­ngalan ng nasabing mga sus­pek nang lumantad si Em­manuel Bonita Judavar na nagsabing si Baldo ang utak sa krimen at isinagawa ang plano ng pagpatay kay Bato­cabe noong Agosto maka­raan siyang magdeklara na tatakbo bilang alkalde sa bayan ng Daraga.

Sa hiwalay na pahayag, sinabi ni Albayalde na napi­litang sumuko ang mga sus­pek sa krimen nang ma­bi­gong makuha ang pera na ipinangako sa kanila ni Baldo na nagkakahalaga ng P5 milyon.

Katwiran umano ni Bal­do, hindi siya makakukuha agad ng pera sa bangko dahil sa umiiral na regulasyon ng Anti-Money Laundering Council (AMLC).