Gunman sa pagpatay kay Batocabe, sumuko na

NASA pangangalaga na ng Bicol police ang 38-anyos na itinuturong gunman sa pananambang kay Ako Bicol Partylist Representative Ro­del Batocabe, matapos itong sumuko sa militar, Hu­webes ng hapon.

Si Henry Yuson, dating miyembro ng New People’s Army (NPA) ay ini­lipat sa kostudiya ng Al­bay Provin­cial Police Office (APPO) sa pangunguna ni Chief Supt. Arnel Escobal.

Una umanong sumuko si Yuson sa isang Army Unit sa Sorsogon bago nailipat sa kostudiya ni Escobal.

Ayon kay Escobal, bu­kod sa kaugnayan ni Yuson sa pagpatay kay Batocabe ay may standing arrest war­rant din ito para sa kinaha­harap nitong kasong rape.

Si Yuson ayon kay Esco­bal ang siyang itinuturong bumaril at nakapatay sa mam­babatas gamit ang cali­ber .40 pistol.

Matatandaang, si Bato­cabe at kanyang security aide na si SPO2 Orlando Diaz ay pinagbabaril ng grupo ni Yu­son habang nagsasagawa ang mga biktima ng Christ­mas gift-giving sa mga se­nior ci­tizen sa Daraga, Albay noong Disyembre 22, 2018.

Kalaunan ay isinangkot ng dalawang pangunahing suspek na sina Christo­pher Cabrera alyas Tuping at Emmanuelle Judavar na ang alkalde ng Daraga na si Carl­wyn Baldo ang utak sa pag­paslang sa kongresista.

Si Yuson ay kabilang sa pitong salarin na inupahan umano ni Mayor Baldo para likidahin si Batocabe. Sina Cabrera, Judavar at Rosello na pawang mga nasa likod ng pananambang sa mam­babatas ay naging pa­nguna­hing mga testigo sa kaso.

Samantala, inihahanda na ng pulisya ang pag­hahain ng kahilingan sa De­partment of Justice (DOJ) na isailalim si Baldo sa Hold Departure Order (HDO) sa pangambang ma­aaring lumabas ito ng bansa para takasan ang ki­nahaha­rap na kaso.