Mga raket ng mga kawatan ngayong bagong taon, alamin
- BULGAR
- Jan 2, 2019
- 2 min read
MGA ka-BULGAR, 2019 na at ang taon daw na ito ay Year of the Pig, ayon sa mga eksperto sa Chinese Calendar. Nagbago na ang taon ngunit, hindi pa rin nagbabago ang mga kawatan sa pamemerhuwsiyo sa kapwa kung saan ibubulgar natin ang ilan sa mga modus ng mga alagad ni ‘Taning’.
1.Palit-pera — sila ‘yung mga vendor (hindi lahat) na nakaabang sa mga mamimili na kapag nagbayad ang biktima, lalo na kung buong P1K ang ibinayad ay nagkukunwari silang abala pero, mabilis ang mga kamay na pinapalitan nang P100 ang perang P1K na ibinayad ng biktima at agad sasabihin ng suspek na P100 lang ang ibinayad ng biktima. Natural, magugulat ang kaawa-awang biktima.
2.Sindikato ng pekeng pera — sila ‘yung mga vendor (hindi lahat) na kapag buong perang papel ang ibinayad ng biktima ay nagkukunwaring magpapapalit ang vendor pero, sa pagbabalik ay idideklara nito na peke ang perang ibinayad ng biktima. Mag-ingat!
3.Doble ang price tag — sila ‘yung vendor (hindi lahat) na dalawa ang price tag na ang isa ay nakatago na kapag binili ng biktima ang paninda ay agad binabaligtad ang price tag ng mas mahal kaysa sa nakalagay sa paninda. Natural, mabibigla ang biktima, maging mapagmasid!
4.Tricycle-in-tandem — sila ‘yung pumapasadang driver (hindi lahat) na may kunwaring pasahero sa likod nito (kasabwat), pero kapag may sumakay na tunay na pasahero ay dinadala nila ito sa liblib na lugar at hinoholdap at ang masaklap kung minsan ay nagagawa rin nila itong pagsamantalahan, lalo na ang kababaihan. Mag-ingat!
5.Bundol Gang — sila ‘yung nagmamatiyag sa mga parking lot na kapag may prospect nang bibiktimahin ay kanila itong sinusundan at kapag nasa ilang na lugar na ay binubundol ng mga demonyong ito ang sasakyan ng biktima at kapag huminto ang biktima ay kanila itong hinoholdap at kapag kaya nila ang biktima ay kinakarnap ng mga balasubas ang sasakyan ng kaawa-awang biktima. Mga ka-BULGAR kapag may bumundol sa inyo, ‘wag na ‘wag kayong bababa sa inyong sasakyan para hindi kayo mabiktima.
Mga ka-BULGAR, ilan lamang ito sa mga raket ng mga walanghiyang anak ni ‘Taning’ na magsilbing babala para hindi kayo mabiktima.
Ikaw kaibigan, anong sey mo?
Laging tatandaan, walang maloloko kung walang magpapaloko!
Ligtas ang may alam!
Kaya ikaw, ako, tayo… mag-ingat!
HAPPY NEW YEAR SA ATING LAHAT!
Comments