16 MAGRIRIGODON PARA SA KORONA NG BIG FOOT 10-BALL

LABING-ANIM na pili at malulupit na mga bilyarista mula sa iba’t-ibang bansa ang mag-aambisyong makuha ang korona ng 2019 Big Foot 10-Ball Challenge na bahagi ng Derby City Classic (DCC) sa Elizabeth, Indiana ngayong Enero 25. Limang manunumbok mula sa lahing kayumanggi ang bumubuo sa tropang Pinoy sa paligsahang bahagi ng mainit na arangkada ng larangan ng bilyar sa susunod na taon. Ito’y binubuo ng nagtatanggol na kampeong si Roberto “Superman” Go­mez, ang anak ng Sorsogon at AZBilliards moneyboard no. 2 cue artist Dennis “Robocop” Orcullo, 2018 DCC Master of the Table at alamat ng Tarlac na si Francisco “Django” Bustamante, 2004 World 9-Ball champ Alex “The Lion” Pagulayan na tubong Isabela at dating World 14.1 Straightpool king Lee Van Corteza.

Pero pangunahin sa balakid ng tropang Pinoy ay ang Alemang si Joshua Filler na sariwa sa pagsikwat ng kampeonato ng 2018 World 9-Ball Championships sa Doha, Qatar kontra kay Carlo “Black Tiger” Biado kamakailan at si 2018 Big Foot 10-Ball bridesmaid Fe­dor Gorst ng Russia. Si Filler na ngayon ang World Pool Billiards Association (WPA) no. 2 samantalang si Gorst ang pangwalo sa pinakama­lupit na bilyarista sa buong mundo.Nasa talaan din ng mga naghahangad sa korona sina dating WPA no. 1 Eklent Kasi ng Albania, 2018 World 9-Ball semifinalist at bayani ng Mosconi Cup na si Shane Van Boening ng USA, WPA no. 9 Scottish Jayson Shaw, John Morra ng Canada (2018 Big Foot 3rd placer), Finland ace Mika “The Iceman” Immonen (tersera rin sa 2018 Big Foot 10-Ball Challenge), WPA no. 10 Chris Melling ng Great Britain, dating WPA no.2 at 2018 US 9-Ball International Open winner Jung Lin Chang ng Taiwan at ang Polish hopeful na si Konrad Juszczysz.