GEMPERO, HARI SA ICA BLITZ CHESS CHAMPIONSHIP SA UAE

SUMULONG ang Pi­noy na si Reynaldo Gem­pero sa halos walang mant­sang kartada upang angkinin ang trono ng katatapos na 5th ICA Blitz International Chess Championships sa Ajman, United Arab Emi­rates.

Kumamada ang wood­pusher mula sa Pilipinas ng 8.5 puntos na nakaangkla na rin ng mga panalo kontra sa mga kinatawan ng New Zealand, Syria at India para makasiguro sa korona sa bakbakang ito ng paspasang ahedres.

Kalahating puntos sa likod ng kampeong Pinoy ay si Ramez Sameir ng Egypt na kumayod para maangkin ang pangalawang puwesto matapos makapangolekta ng pitong panalo at dalawang tabla.

Malayong pangatlo ang Indian bet na si Anand Shre­yas sa rekord niyang 6 na puntos at mas mataas na tiebreak output kontra sa dalawang iba pang pawn­pushers.

Ang Pinay na si Emer­linda San Andres ay pu­mang­lima sa pangkalahatan at siya ring hinirang na best lady performer sa tulong ng kanyang nairehistrong li­mang panalo at dalawang tabla.

Samantala, nagbunyi ang punong-abalang Russia nang tanghaling hari ng 2018 King Salman World Rapid Chess Championships ang local pride na si GM Daniil Dobov matapos maungu­san ng Ruso ang mga elite rapid chessers na sina GM Mag­nus Carlsen ng Norway, US bet at GM Hikaru Naka­mura, GM Shakhriyar Ma­medyarov ng Azerbaijan at Armenian GM Levon Aro­nian sa St. Petersburg. Si Dobov, 25th ranked lang sa paligsahan, ay nakaipon ng 11.0 puntos mula sa 15 rounds ng bakbakan saman­talang sina Carlsen, Naka­mura at Mamedyarov ay naiwan ng bahagya sa iskor na 10.5 puntos.

Kinapos ang kampanya ni Carlsen, ang kasaluku­yang world champion sa standard chess, dahil sa tat­long pagkatalo na natik­man niya sa torneong nila­hukan ng 150 rapid chessers mula sa iba’t-ibang parte ng mundo.