Fire volunteer pinagbabaril, utas

PATAY ang isang fire volunteer matapos pagba­barilin ng dalawang suspek na sakay ng kotse, kama­kalawa ng hapon sa Tondo, Manila.

Dead-on-spot si Dennis Tolentino, 38, bukod sa fire volunteer, nagsa-sideline din ito bilang bartender, residente ng Balut, Tondo.

Blanko naman ang pu­lisya sa pagkakakilanlan ng dalawang suspek na sakay ng pulang Toyota Wigo na walang plaka.

Batay sa ulat ni PO3 Mark Daniel de Guzman kay P/Insp. Rommel Ani­cete, alas-4:40 ng hapon nang mangyari ang pama­maril sa harap ng isang bahay sa Balut, Tondo.

Una rito, sakay umano ng motorsiklo si Tolentino sa nasabing lugar nang diki­tan ng kotse na lulan ng da­lawang suspek, saka ito pi­nagbabaril.

Agad namang tumakas ang suspek sa direksiyon ng Younger St., sa Balut pag­katapos ng krimen.

Sa impormasyong naku­ha sa misis ng biktima, ka­makailan ay mayroon uma­nong nakaaway ang kanyang mister pero, hindi niya idi­netalye kung ano ang pinag-awayan at kung sino ang na­kaaway ng biktima.