ORCULLO AT BIADO, PETMALU AT WALANG KUPAS SA FARGO RATING

ITINUTURING na pi­na­­kamalupit sa mga bil­yaristang Pinoy sina Dennis “Robocop” Orcullo at Carlo “Black Tiger” Biado at ito ay maaaninag sa pinaka­huling Fargo Rating para sa mga top cue artists sa buong mundo.

Nakaupo si Orcullo sa pang-anim na puwesto tag­lay ang 813 puntos habang ang naipon ni Biado na 809 puntos ay sapat na para sa pang-8 baytang.

Si Orcullo ay kilalang matikas sa American pool circuit at sa ngayon ay nasa pangalawang posisyon sa AZBilliards Moneyboard. Nakapag-uwi na ang 39-anyos na tubong Sorsogon ng kabuuang $72,200 mula sa mga torneong sinalihan niya ngayong 2018. Kasama rito ang mga napagharian niyang West Coast 10 Ball Pro Challenge (Mountain­view, California nung Hul­yo), Houston Open (League City, Texas sa Setyembre), Freezer’s Icehouse 1-Pocket Challenge (Tempe, Arizona sa buwan ng Hulyo), Derby City Classic Straightpool Challenge (Elizabeth, Indiana noong Enero) at 5th Annual Junior Norris Memorial Shootout Open 10-Ball (Wichita Falls, Texas sa Hunyo). Sa kabilang dako, si Biado, 35-taong gulang ay nagmamarka sa mga World Pool Billiards Association (WPA) na events.

Kama­kailan lang ay sumegunda siya sa 2018 World 9-Ball Championships at puma­ngat­lo siya sa All-Japan 10-Ball Billiards. Sa naturang dalawang paligsahan, si Biado ang naging highest-placed bilya­rista mula sa Pilipinas.