PINOY PACIO KONTRA SARUTA NG JAPAN, ABANGAN SA ONE

INANUNSIYO ng ONE Championship ang nakatakdang ONE: Eternal Glory na idaraos sa Istora Senayan sa Jakarta sa Enero 19, 2019 kung saan sasabak sa main event, si reigning ONE Strawweight World Champion Joshua “The Passion” Pacio ng Pilipinas para depensahan ang titulo kontra Yosuke Saruta ng Japan.

Unang nasungkit ni Pacio ng Baguio City ang ONE Strawweight World Championship sa bisa ng unanimous decision victory kontra dating titleholder Yoshitaka Naito sa ONE: Conquest of Heroes noong Setyembre na isang epikong rematch. Babanat ang 22-anyos na si Pacio kay Saruta, isang Shooto Strawweight World Champion.

Sa iba pang laban, haharap si Featherweight prodigy Christian “The Warrior Lee” ng Singapore kay veteran martial artist Edward “The Ferocious” Kelly para sa rematch. Magtatagisan sina Indonesian national wushu champion Pris­cilla Hertati Lumban Gaol at wushu champion Puja Tomar sa women’s atomweight showdown.

Balik aksiyon naman si Joseph “The Hurricane” Lasiri kontra Jonathan Haggerty ng England sa ONE Super Series Muay Thai contest. Abangers din ang marami kay Stefer Rahardian ng Indonesia kontra kay Robin “The Ilonggo” Catalan ng Pilipinas para sa strawweight battle. Unang panalo naman ang pakay ni two-time Brazilian Jiu-Jitsu No Gi World Champion Bruno Pucci ng Brazil laban kay Japanese warrior Kotetsu “No Face” Boku sa sa feather­weight contest.

Mula sa tagumpay si Anthony “The Archangel” Engelen ng The Netherlands nang tigpasin sina Meas Meul at Jimmy Yabo sa first round at haharap siya kay Thai Rithy ng Cambodia sa ONE: Eternal Glory.

Haharap si Kickboxing world champion Florent Kaouachi ng France kay Steve “The Smashing Machine” McKinnon sa ONE Super Series kick­boxing contest. Magbabanga­san sina dating Afghan ban­tamweight at featherweight champion Ahmad Qais Ja­soor at Japanese Martial arts veteran Masakazu “As­hi­kan Judan” Imanari sa fea­therweight contest. (MC)