GM’S ANTONIO AT GOMEZ, BEST PLACED SA ASIAN CONTINENTAL CHESS
UMIGTING ang bakbakan para sa korona ng open division nang angkinin ng walong woodpushers ang liderato samantalang unti-unti nang umaalagwa ang isang kinatawan ng India sa women’s bracket pagkatapos ng ikaanim na bahagi ng ginaganap na 2018 Asian Continental Chess Championships sa Tiara Hotel ng Makati.
Pare-parehong may naipong 4.5 puntos sina GM Surya Shekhar Ganguly (India), GM Yi Wei (China), GM S.P. Sethuraman (India), GM Nodirbek Abdusattorov (Uzbekistan), GM Son Truong Ngo Nguyen (Vietnam), GM Mohammad Amin Tabatabaei (Iran), GM Hao Wang (China) at GM Santosh Gujrathi Vidit (India) para magsosyo sa trangko.
Nakabuntot sa leadpack ang dalawang Intsik, isang Vietnamese at isang Iranian dala ang apat na puntos at sa ngayon ay may pag-asa pa sa FIDE World Cup berth.
Ang best-placed Pinoy chessers sa kasalukuyan ay sina GM Rogelio Antonio Jr., GM John Paul Gomez, IM Ricardo De Guzman at FIDE Master Joseph Mari Turqueza dahil sa matamlay na naisubing tatlong puntos lang.
Samantala, si IM Padmini Rout, pangwalo sa seedlings (FIDE rating: 2345), ay may naipong 5.5 puntos matapos talunin si 10th ranked Woman Grandmaster Quianyung Gong ng China.
Sa pagpasok sa huling tatlong rounds, ito ay maalwan nang bentahe kontra sa pumapangalawang Chinese bet at pre-tournament favorite na si Woman International Master Jiner Zhu na may rekord na 4.5 puntos.
Nakuha ng Pinay na si WIM Jan Jodilyn Fronda, ranked 24th at may rating na 2139, ang isang buong puntos mula kay Woman FIDE Master Aashna Makhija ng India upang mapanatili ang kanyang tsansa sa podium ng women’s division.
Ang kanyang naipong 3.5 puntos sa kabuuan mula sa tatlong mga panalo, isang tabla at dalawang talo ay sapat na para makasosyo niya ang anim na iba pang lady chessers para sa pag-upo sa pang labing-isang puwesto.
Sila ay kalahating puntos lang ang layo sa pangatlong pulutong na may apat na puntos.
Comments