Senior citizen, dinedma at pinahirapan | Priority lane ng Korean Air, wa’ ‘wenta!
NALALAPIT na ang Pasko kaya tiyak na may ilan sa atin ang mamamasyal sa ibang lugar o ibang bansa.
Kaya lang, paano kung ang masaya sanang bakasyon, eh, nasira na hindi pa man nagsisimula?
Kahapon, mismong ang inyong lingkod at ang aking pamilya ang nakaranas ng hindi maayos na pakikitungo ng tauhan ng Korean Air.
Pasado alas-9:00 ng umaga nang dumating kami kasama ang aking pamilya sa Ninoy Aquino International Airport. Kasama ko ang tatay kong senior citizen na may sakit at mga bata kung saan kabilang kami sa Flight ke 622 Mnl to Incheon.
Kaagad kaming pinapila sa priority lane dahil may kasama nga kaming naka-wheelchair at mga bata. Gayunman, lumipas ang tatlo hanggang apat na oras ay hindi pa rin kami nakakaalis at naunahan pa ng ibang nasa economy class na hindi nakapila sa priority lane.
Nakapagtataka, hindi ba? Kaya nga kami pinapila sa priority lane para mauna, pero bakit kami pa ang nahuli? Tsk!
Samantala, nang magreklamo kami hinggil dito, saka lang kami inasikaso ng Korean Air supervisor na si Jonathan Linao Carlo.
Bagama’t tumugon naman siya sa aming reklamo, napaka-incompetent nito sa pagsagot sa mga passengers na tulad namin.
Hindi natin sinasabi na “customer is always right”, pero dahil obvious naman na siya ang may pagkukulang, matuto naman sana siyang humingi ng maayos at sincere na paumanhin at magpakumbaba.
Dahil sa nangyari, gusto naming kalampagin ang mga nakatataas sa nasabing airline na imbestigahan at bigyan ito ng mabilis na aksiyon nang sa gayun ay hindi na maulit pa sa ibang mga pasahero.
Palagi nating tatandaan na bukod sa nakasaad sa batas na dapat nating bigyan ng prayoridad ang persons with disabilities (PWDs), mga may kasamang bata at mga buntis, karapatan din nilang maasikaso kahit saang establisimyento pa sila pumunta!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments