Pulis binentahan, 3 kulong sa shabu

TATLONG hinihinalang drug pushers kabilang ang 22-anyos na babae ang arestado matapos magbenta ng shabu sa pulis na nagsagawa ng buy-bust operation sa Caloocan City.

Kinilala ni Caloocan Police Chief Sr. Supt. Restituto Arcangel ang mga suspek na sina Menso Daud, 21; Salahudin Managantan, 32, beautician at Almera Hadjimustapha, 22, ng Bgy. 188, Tala.

Ayon kay PO1 Aian-Jay Gamayon, alas-11:25 ng gabi nang isagawa ng mga operatiba ng SDEU sa pangunguna ni PCI Rengie Deimos ang buy-bust operation kontra sa mga suspek sa Lapu-Lapu St., Bgy. 78.

Nagawang makabili sa mga suspek ng isang plastic sachet ng shabu ni PO1 Albert Alan Badua na nagpanggap na poseur-buyer kapalit ng P10,000 buy-bust money.

Matapos ang transaksiyon, agad sumugod ang back-up na mga operatiba saka sinunggaban ang mga suspek.

Narekober din sa mga ito ang dalawa pang plastic sachets ng hindi pa matukoy na halaga ng hinihinalang shabu.