Pagbibigay ng limos, ipinagbawal!
ANG diwa ng Pasko ay maraming kahulugan, pag-ibig, pagmamahalan at pagbibigayan, kaya bukod sa pangangaroling, tiyak na marami na ring namamalimos sa mga lansangan.
Kung saan muling ipinaalala ng Department of Social Welfare and Development (DSWD) sa publiko na huwag bigyan ng limos ang mga street dweller lalo na ngayong kapaskuhan.
Ito ay dahil mas lalo umano silang nahihikayat na magpagala-gala sa mga kalsada at baka ito pa ang maging dahilan na mapahamak sila.
Sinabi ni DSWD Assistant Secretary at Spokesperson Glenda Relova, tuwing sasapit ang Pasko, maraming Badjao at Aeta ang pumupunta sa Maynila para mamalimos na ginagawa na nilang kabuhayan.
Gayunman, wala namang masamang magbigay lalo na at ‘yun talaga ang naging tradisyon nating mga Pinoy, ang problema nga lang, kung patuloy tayong magbibigay sa kanila, mas tinuturuan natin silang palagi na lang nakaasa sa atin at hindi magsikap para makaahon sila sa kahirapan.
Kaya naman ang panawagan natin sa mga kinauukulan, magsagawa ng mga programa na tiyak na makatutulong sa kanila nang sa gayun ay hindi na nila kakailanganing mamalimos pa.
Kung posible, bakit hindi sila bigyan ng oportunidad na trabaho o pagkakakitaan?
‘Ika nga, mas magiging matagumpay ang indibiduwal kung kikita sila sa maayos na pamamaraan.
Samantala, sa isinusulong ng ahensiya na #helpthehomelessph na may layong bigyan ng tama at responsableng tulong ang mga taong-kalye tulad ng gift-giving events, story-telling o art sessions, gayundin ang feeding programs at medical missions, dapat natin itong suportahan.
Palagi nating tatandaan, pagtutulungan ang kailangan ng bayan!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments