Hubugin ang mga mag-aaral sa 21st Century skills

KUYA WIN GATCHALIAN / WIN TAYONG LAHAT

MAY mga batang likas na malikhain na kahit hindi pa nagsisimulang mag-aral ay kapansin-pansin na agad ang kanilang pagiging mapa­raan na karaniwang nakikita sa kanilang pakiki­paglalaro at pakikisalamuha sa iba. Dahil dito, nagiging maabilidad sila habang lumalaki.

Upang mahasa ang kanilang malikhaing pag-iisip, mahalagang mahubog ang tinatawag na 21st Century skills ng mga bata kung saan malilinang ang kanilang abilidad sa kolabo­ras­yon, digital literacy, critical thinking at problem-solving sa pamamagitan ng pag-alalay at pagsu­baybay ng mga guro sa loob ng klasrum.

Ayon sa ating mga teacher, ang palatandaan ng mga estudyanteng malikhain ay ang mga indibidwal na may kakayahang makaisip o makabuo ng mga ideya, alternatibo o mga posi­bilidad na maging kapaki-pakinabang upang malutas ang mga suliranin, makipagtalastasan sa kapwa nila mag-aaral at libangin ang sarili at ibang tao.

Sa paglipas ng panahon at sa kanilang paglaki ay mamamalas ang kanilang kaka­ibang katangian tulad ng mga sumusunod:

• Pagiging maalam.

• Mapagmasid sa kapaligiran.

• Malawak ang imahinasyon na nagdudulot sa kanilang na gumawa ng mga produktibong bagay.

• Kritikal na pag-iisip na ang intensiyon ay ang kabutihan ng nakararami.

• Sensitibo at marunong umunawa ng emos­yon ng kapwa.

• Non-conformist o hindi mabilis umayon sa mga pangkaraniwan, sa halip ay naghahanap ng mga alternatibong paraan.

• Mataas ang motibasyon at may tiwala sa sarili na pangunahan ang mga ideya o pagkilos.

Payo ng mga kinauukulan ng Department of Education (DepEd) sa mga magulang ng mga pre-schooler, maaaring matulungan ang kanilang pagiging malikhain sa pamamagitan ng paglalagay ng simple at permanenteng lugar para magsulat, gumuhit o lumikha, pagbibigay sa bata ng kalayaan sa pagsasalita at i-assist sila sa anumang paraan tulad na lamang ng pag­bili ng kanilang kakailanganing sup­plies o tulungang gumupit ng crafts.

Para sa mga guro, makatutulong sila sa mga estudyante sa pamamagitan ng pagsa­sagawa ng mga gawaing ito:

• Hanapin at sama-samang gawin ang mga bagay na nagbibigay ng interes sa mga bata.

• Magsagawa ng pagsusuri.

• Tanggapin ang iba’t ibang estilo ng pagka­ma­likhain ng bawat isa.

• Hands-on o tutok na pagtuturo.

• Maging interactive sa pagtuturo.

• Ibahin ang ayos ng klasrum, gawin itong ka­aya-aya at makulay para sa pag-iisip at pag­mumuni-muni.

• Gawing collaborative ang pagtuklas ng kaalaman — gumawa ng mga aktibidad na pagtutulung-tulungan nang sabay-sabay.

• Ibahin ang format ng pagbibigay ng mga takdang-aralin.

• Magkaloob ng premyo at recognition upang mas maging interesado ang mga estud­yante.

• Magsagawa ng team building.

Nakasalalay sa pagtuturo ng mga nakata­tanda ang paghusay ng batang mag-aaral kaya dapat tayo mismo ay maging malikhain din sa pagtuturo, may saya, kawili-wili at palaging may bagong gawain na nakaeengganyo sa mga estudyante upang makapag-isip, lumikha ng mga ideya o bagay na kapaki-pakinabang sa bawat isa maging sa ating lipunan.

Tandaan, na ang ating layunin ay hindi la­mang magturo ng impormasyon at prinsipyo kundi para matulungan din ang kabataang ma­pabuti at maging panatag ang kanilang kinala­lagyan sa ating bansa.

Sa ban­dang huli, tamang pagpapalaki pa rin ang susi sa kanilang pagiging malikhain!