Karapatan ng mga kliyente ng mga abogado
ANG Code of Professional Responsibility na marapat na sinusunod ng mga manananggol ay nagsasaad ng mga nararapat na aksiyon ng mabuting tagapagtanggol. Ang relasyon ng abogado at ng kanyang kliyente ay nakabase sa pagtitiwala ng kliyente sa kakayahan ng kanyang abogado na ipagtanggol at ipaglaban ang kanyang mga karapatan. Kinakailangan na ang pagtitiwalang ito ay panatilihing hindi masira ng abogado hanggang sa kahit ang kanyang serbisyo ay natapos na. Kapag tinanggap ng abogado ang kaso ng kanyang kliyente, marapat na ipaglaban niya ito sa abot ng kanyang makakaya, nang naaayon sa sinasabi ng batas, nang buong kahusayan at ibayong pag-iingat upang maipagtanggol niya ang kanyang kliyente. Gayundin, ang kaso ng kliyente ay hindi dapat tanggihan ng abogado dahilan lamang sa kanyang lahi, kasarian, paniniwala o kanyang sariling opinyon sa kinalaman nito sa kasong kanyang kinasasangkutan.
Ayon sa Code of Professional Responsibility, karapatan ng kliyente na mapanatiling sikreto nila ng kanyang abogado ang kanilang bawat komunikasyon o pinag-uusapan. Kaugnay nito, kapag ang kliyente ay humingi ng payo sa abogado, karapatan niyang makakuha ng tapat at totoong payo tungkol sa kanyang problema. Kapag ang abogado ay nakatanggap ng pera o ari-arian para sa kanyang kliyente, karapatan ng kliyente na masabihan ng kanyang abogado na mayroon siyang natanggap na pera o ari-arian para sa kanya. Kaugnay nito, responsibilidad ng abogado na pag-ingatan at ibigay sa kanyang kliyente ang nasabing mga pera o ari-arian. Kapag hiniling ng kliyente na ibigay sa kanya ang mga ito, responsibilidad ng abogado na ibigay ito sa kliyente. Kapag hindi ibinigay ng abogado ang mga ito, may karapatan ang kliyente na idemanda ang kanyang abogado para mabawi ang mga ito sa kanya.
Karapatan ng kliyente na hilingin sa kanyang abogado na ipagtanggol ang kanyang kaso nang may ibayong pag-iingat at husay. Hindi dapat humahawak ang abogado ng kaso nang walang preparasyon. Kapag nagpabaya ang abogado sa kanyang kaso at nagbunga ito ng kapinsalaan sa kanyang kliyente, ang nasabing abogado ay mananagot sa kanyang kliyente. Subalit, sa pagtatanggol ng abogado sa kaso ng kliyente, dapat malaman din ng kliyente na magagawa lamang ng abogado niya ang mga bagay na naaayon sa batas. Hindi dapat gumawa ang abogado ng labag sa batas para lamang ipagtanggol niya ang kanyang kliyente sapagkat labag ito sa sinumpaang tungkulin ng mga abogado.
Kapag humingi ang kliyente mula sa kanyang abogado ng impormasyon sa estado ng kanyang kaso, ang kanyang abogado ay kinakailangang makapagbigay ng nasabing hinihinging impormasyon sa lalong madaling panahon.
Sa relasyon ng abogado at kliyente, marapat na mayroong pagtitiwala sa kanilang pagitan sapagkat ito ang magiging malakas na pundasyon upang magawa ng bawat panig ang kanilang responsibilidad upang makamit ang ipinaglalabang hustisya.
Comments