UMIISPAR NA SI MAYWEATHER, TENSHIN AT PACMAN, POSIBLE

BALIK na sa pakikipag-sparring si dating pound for pound king floyd 'money' mayweather, ayon sa impormasyon ng WBN.

Ang 41-anyos na si Floyd na huling lumaban noong Agosto 2017 ay nakaiskedyul na sumagupa sa Dis. 31 sa Japan. Tuloy ang exhibition fight ng mamang itim kay Tenshin Nasukawa na tiyak kikita ang Kano ng seven-figure sum sa 9 na minuto lang na bakbakan.

Ang dating Mayweather Promotions fighter na si Ashley Theophane na abala ngayon sa World Tour ang insider sa bawat galaw ni ‘Money.’ Kinumpirma ni Theo­phane na balik muli sa gym si Mayweather at aniya hindi lang si Tenshin ang nakatakdang makasagupa ng mamang itim. “Floyd is back sparring. He could be sparring because of the exhibition in Japan. But all I know is he’s sparring for something. The public will know when he wants them to,” eksklusibong saad ni Theophane sa World Boxing News na lumabas sa Philboxing.

Nang tanungin kung lalaban pa si Mayweather pagkaraan ng kanyang show-fight sa Tokyo, sumagot si Theophane na, “It’s possible. It’s boxing. If it makes money, it makes sense!”

Kasunod ng impromptu meeting, nabanggit si Manny Pacquiao na potensiyal na kasagupa sa 2019. Lumagda na si Pacquiao sa parehong manager ni Mayweather na si Al Haymon. Makasasagupa rin ng Pinoy ang kaibigan ni Mayweather na si Adrien Broner sa Enero 19, 2019 sa Las Vegas.

Tila handang-handa na at tuloy na ang ikalawang ‘most lucrative fight of all time,’ na pinaniniwalaan ni Theophane na tiyak kikita sina Mayweather at Pacquiao ng ten-figure payday. “Obviously, Pacquiao is fighting Broner. If Broner wins, I can’t see Floyd fighting him but you never know. But the Pacquiao rematch is possible. (MC)