LIFESAVERS, PASOK SA SEMIS NG SUPERLIGA, INOLATS ANG SMART

PORMANG pang-champion ang ipinamalas ng Generika-Ayala Lifesavers nang talunin ang Smart Gigahitters sa bisa ng straight sets, 25-16, 26-24, 25-22 upang makauna sa semifinal seat sa Philippine Superliga All-Filipino Conference kahapon sa Batangas City Sports Coliseum.

Malakas na laro ang ipinakita ni Mikaela Lopez habang sina Ria Meneses at Patty Orendain ay uminit ang laro sa krusyal na minuto sa umibayong laban ng Lifesavers na muling nagbalik sa semifinals ng prestihiyosong women’s club tourney makaraan ang matagal na hindi paglalaro.

Dinomina ni Lopez ang gitna, tumapos ng 16 points, may 11 kills, 4 blocks at ace habang sina Meneses at Orendain ay matikas ang opensiba sa bisa ng 15 at 14 points. Sa naturang panalo, mamartsa ang Lifesavers sa semifinals laban sa survivor ng quarterfinal battle sa pagitan ng F2 Logistics at Cocolife sa torneo na idaraos bukas sa FilOil Flying V Center.

Unang semis din ito ng Lifesavers mula nang magwagi ang prangkisa sa All-Filipino title at nag-runner up sa Petron sa Grand Prix ng 2014. “This game was very important for us because we lost to Smart in the Invitationals,” ani Lopez. “And now that we’re here in the semifinals, we will go out fighting.”

Bumakas si Fiola Cebal­los ng 11 points, kabilang na ang game-winning ace para umalagwa sa 20-22 deficit at iselyo ang panalo sa 80 minuto ng laro. Naiwan pa ang Lifesavers sa third set, 20-22, pero nakaiskor ang limang straight points mula sa back-to-back hits nina Oren­dain at Lopez bago isara ni Ceballos ang semis-clinching ace.

May 13 at 9 puntos sina Jerrili Malabanan at Aiko Urdas habang si Soltones ay may 3 points sa kabila ng 21 excellent receptions at 17 digs para sa Smart, at isinara ang kampanya sa preliminaries na may 4 na panalo sa 10 laro. (MC)

Laro Bukas (FilOil Flying V Centre) 12:00 pm — FEU vs UE 2:00 pm — La Salle-Dasmariñas vs UP 4:00 pm — Foton vs Cignal 6:00 pm — F2 Logistics vs Cocolife