Nagbabantang TRAIN Law 2, 'di na mapipigilan

MS. KORINA SANCHEZ / ISYUNG 'K'

SA isang talumpati sa Palasyo, nasabi ni Pa­ngulong Rodrigo Du­ter­­te na gumamit umano ito ng marijuana para manatiling gising sa Singapore noong ASEAN Summit. Mahirap daw kasi ang schedule ng ASEAN Summit noon. Kaya ba siya wala sa ilang miting noong ASEAN, dahil “nagpa­pahinga”? Pero binawi, niya ito at nagbibiro lang daw siya. Sinegun­dahan din agad ni Sen. Koko Pimentel na kahit kailan ay hindi raw nag-marijuana si P-Duterte. Pero bago ‘yan, tila ipi­nag­tanggol din agad ni Sen. ‘Tito’ Sotto ang pagma-marijuana umano ng pa­ngu­lo at nagpapakalma lang daw.

Ilang beses nang naga­ganap ang ekse­nang ito. Mayroon bang sa­sa­bihin si P-Du­terte? Dahil sa bawat pagka­kataon na nang­yayari ito agad ding itatanggi o may nagpa­pa­liwanag tungkol dito. Si P-Du­terte mismo ang nagsa­bing nagbibiro lang siya. Paano seserysohin ang pinakamataas na opis­yal ng bansa, mag­bi­bigay na lang ba tayo ng panahon para sa sinuman na magpapali­wanag sa mga mapa­ngahas na pahayag ng pangulo o huwag na lang pansinin?

◘◘◘

Ilang linggo nang bumababa ang presyo ng gasolina at diesel na siyempre, ikinatutuwa ng lahat. Tila maagang pamasko sa bansa pero, para malaman ng lahat na hindi na mapipigilan sa parating na taon ang karagdagang buwis na ipapataw sa lahat ng produktong petrolyo na bahagi ng TRAIN Law. Dahil mas mababa na ang presyo ng langis, ipa­tu­tupad na ang panga­lawang bahagi nito.

Talagang hindi ma­big­­yan ng pahinga ang mga Pilipino sa mga pagtaas ng presyo ng mga bilihin. Buma­baba ang presyo ng langis ngunit, kakabig naman ang gobyerno sa mama­mayan. Tiyak na papalo ulit ang inflation. Hindi natin alam kung ano pa ang papata­wan ng karagdagang buwis sa ilalim ng pabigat na TRAIN Law sa parating na Bagong Taon. Sigu­radong hindi lang pro­duktong petrol­yo ang mapapatawan ng buwis. Sana, biro lang din ang mga pahayag na papata­wan ng buwis ang anu­mang produkto sa dara­ting na Bagong Taon.