GM SO, FINALIST NA SA ESPORTS WORLD SPEED CHESS C’SHIPS

SUMIBAD si Pinoy Grandmaster Wesley So sa finals ng 2018 World Speed Chess Champion­ships matapos daigin si Jan Krzysztof Duda ng Poland, 20.0 - 7.0, sa ka­kaibang torneo ng mabi­lisang ahedres na gina­ganap “online” at tinata­wag ding eSports Brac­ket.

Itinuturing na giant-killer ang Polish ace dahil nakarating ito sa final 4 sa pamamagitan ng paninilat sa mga batikang pambato ng Russia na sina GM Sergey Karjakin (13.0 - 11.0) at GM Alexander Grischuk (14.0 - 13.0).

Kung tutuusin ay ba­hagyang pinapaboran ng mga tagamasid si Duda para mangibabaw kontra sa tubong-Cavite na wood­pusher sa isang close fight. Pero hindi inintindi ni So ang pananaw ng mga mi­ron at madaling idinis­patsa ang karibal mula sa Poland.

Habang inihahanda ang artikulong ito ay kasalukuyan pang nagla­laban sina GM Hikaru Nakamura ng United States Chess Federation at Armenian GM Levon Aronian para malaman kung sino ang makasa­sagupa ng 25-anyos na Pinoy para sa korona.

Nasa pangalawang puwesto sa FIDE ranking si Nakamura, topseed ng torneo, sa rapid chess dala ang kanyang 2844 na ra­ting samantalang naka­upo sina So (rating: 2808) at ang 2017 FIDE World Cup king na si Aronian (rating: 2802) sa pang-anim at pampitong baitang ayon sa pagkakasunod-sunod.

Sa Blitz world stan­ding naman, pangatlo si Nakamura, pang-apat si Aronian at pang-12 si So.

Nauna rito, inilampaso ni So ang Intsik na si GM Wei Yi, 18.5 - 9.5 sa kan­yang unang serye bago niya tinuruan ng leksyon si Indian GM Vidit Gu­jarathi, 16.5 - 10.5, sa quar­terfinal na duwelo para makarating sa semifinals.