MAY BOXING SA TOKYO O WALA NANG AIBA?

BINABALANGKAS na ng International Olym­pic Committee (IOC) ang mga detalye ng magiging landas nito para mawala sa eksena ang International Boxing Association (AIBA) bilang organizer kapag gina­nap na ang boxing tour­nament sa 2020 Tokyo Olympics.

Bagamat nakikiram­dam sa posibleng mga balakid na legal, isa sa mga alternatibong tini­ting­nan ng IOC ay ang pagbuo o pagbibigay ng kapangyarihan sa isang grupo upang i-organisa ang bakbakan ng mga simonpures sa loob ng ring sa Olympiada sa Japan halos wala nang dalawang taon mula ngayon.

Napaulat namang nangako ng suporta ang World Boxing Associa­tion (WBA) at World Boxing Council (WBC) sa mga galaw na tutulong upang siguruhin ang pag­kakaroon ng boxing tilt sa nabanggit na lungsod sa Asya sa 2020.

Nauna rito, nagba­bala ang IOC na kung mahahalal si Gafur Rak­himov ng Uzbekistan bilang presidente, ma­tatanggalan ng accredi­ta­tion ang AIBA.

Ilang kadahilanan ang lumutang pero si­nasabing ang ugat ng banta ay ang diumano ay pagkakasangkot ng Uzbek sa mga ilegal na aktibidades at krimen.

Kamakailan din ay lu­mutang ang pagkaka­sara ng isang Swiss bank account ng AIBA dahil sa tinagurian nitong “re­putational risk”.

Hindi natinag ang karamihan ng boxing associations at iniluklok pa rin si Rakhimov sa pi­nakamataas na upuan ng AIBA nang kuman­didato ito kontra kay Kha­zak Serik Konakba­yev.

Isa ang boxing sa mga sinasandalan ng bansa bilang huhugu­tan ng karangalan pag­dating sa international compe­titions at anuman ang mangyayari sa siga­lot na IOC-AIBA ay tiyak na susubaybayan ng box­­ing officials ng Pili­pinas.