Kelot nag-dive sa pool, tigok

DEDO ang isang turistang Koreano makaraang mabagok ang ulo nang mag-dive sa swimming pool habang naliligo sa isang resort sa Station 2 sa Boracay.

Nadala pa sa ospital ang 29-anyos na si Chao Jeasok subalit, sa tindi ng pinsala na tinamo sa ulo nito ay binawian din ito ng buhay.

Batay sa inisyal na imbestigasyon, nagkayayaan si Chao at kapatid nitong babae na maligo sa Villa Sunset Resort, pero bago lumangoy ay uminom muna ng isang bote ng beer ang biktima.

Sinasabing nag-dive ang Koreano sa mababaw na pool na may lalim na apat hanggang limang talampakan at tumama ang kanyang noo sa sementadong sahig ng swimming pool.

Napansin pa umano ng security guard ang pag-dive ng turista, ngunit, makalipas ang tatlong minuto ay hindi pa ito umaahon kaya sinubukan pa siyang sagipin.