Money transfer hinoldap ng 2 ‘sekyu’

NILOOBAN ng dala­wang lalaki na nakasuot ng security guard uniform ang isang sangay ng money trans­fer company kama­kalawa sa Taguig City.

Kinilala ang mga bik­timang sina Danilo Bucsit, 57, guwardiya; Nicole Shane Lacia, 25, at Wenceslina Roderos, 62.

Base sa report na na­tanggap ng Southern Police District, nangyari ang pan­loloob ala-1:05 ng hapon sa loob ng Cebuana Lhuillier sa Phase 2, Bgy. Pinagsama Vil­lage, Taguig City.

Sinasabing habang naka-duty ang guwardiyang si Bucsit, dumating ang dala­wang lalaki na magkaang­kas sa isang pink na motor­siklo na walang plaka na naka­suot ng security guard uni­form kung saan ang isa ay naka-reflectorized vest at ang isa naman ay naka-com­mouflage green jacket.

Kinausap ng mga ito si Bucsit at nagpanggap na mga customer at sabay nag-anun­siyo ng holdap at tinu­tukan ng baril ang mga taong nasa loob ng naturang mo­ney trans­fer.

Kinuha ang kalibre .38 service firearm ng guwar­diya, agad na nakatakbo ang kahera at nakapagtago kaya napagbalingan ng mga hol­daper ang mga kostumer na sina Lacia at Roderos.

Natangay sa kanila ng mga suspek ang cellphones, ATM cards at P7,000 cash.