2 tumangay ng motor, todas

DEDBOL ang dalawang lalaki na sinasabing magnanakaw ng motorsiklo matapos makipagbarilan sa pulisya sa Bgy. Gulod, Novaliches, Quezon City.

Ayon sa pulisya, gabi ng Martes nang makatanggap sila ng tawag mula sa biktima umano ng dalawang suspek.

Tinutukan umano ang biktima ng baril ng mga suspek at puwersahang kinuha ang kanyang motor habang siya ay nasa kahabaan ng Doña Isaura Street.

Kasunod nito, isa namang ulat ng panghoholdap ang nakarating sa himpilan ng pulisya. Ayon sa biktima, sakay ng motorsiklo ang dalawang armadong lalaki.

Sa pagsasagawa ng follow-up operation, namataan ang mga suspek sa kahabaan ng Villareal Street at doon na sila nagkahabulan matapos humarurot ng mga suspek.

Nang makorner ang mga ito, kapwa bumunot ng baril ang mga lalaki at pinaputukan ang mga pulis.

Gumanti ang mga pulis na nagresulta sa pagkamatay ng mga suspek.

Narekober mula sa dalawa ang isang kalibre .38 at isang .45 na ginagamit sa kanilang modus.