3 holdaper ng jeep, timbog

ARESTADO ang tatlong holdaper na nambiktima ng mga pasahero ng isang pampublikong jeep sa tapat ng Philippine General Hospital sa Taft Avenue, Ermita, Manila.

Kinilala ang mga suspek na sina Angelo Camelon, 18, ng Masambong, Quezon City; Leomer Balacuit, 18, miyembro ng Sigue-sigue Sputnik Gang, ng Sta. Cruz, Manila at Omar Manonggiring, 48, ng San Andres Bukid, Manila.

Inireklamo ang mga ito ng mga biktimang sina Mario Sedenio, 63, Edita Sedenio, 53 at Denjie Onalan, 21.

Batay sa imbestigasyon, hinoldap ng mga suspek ang mga biktima gamit ang icepick at baril habang nakasakay sa pampasaherong jeep.

Pagbaba ng mga suspek, agad na nagsisigaw ng tulong ang mga biktima dahilan para maaresto ang mga suspek ng mga nagpapatrulyang pulis.

Narekober mula sa mga suspek ang isang .38 kalibre baril at icepick at mga nakulimbat sa mga biktima.