Hirit ng ilang empleyado, P20 na dagdag sa minimum wage, hindi sapat!
SINO ba ang hindi matutuwa kapag nadagdagan na ang minimum wage rito sa bansa?
Sa katunayan, matagal na itong hinihiling ng ating mga kababayan dahil sa nararamdaman nating pagmamahal ng mga bilihin sa kasalukuyan, pero sa tuwing may isinusulong na halaga ng dagdag-suweldo, may ilan pa rin na umaalma dahil mababang halaga lang ang sinasang-ayunan ng gobyerno.
Gayunman, magandang balita pa rin para sa mga manggagawa sa Region 2 dahil epektibo na simula ngayong araw ang dagdag na beinte pesos sa kanilang minimum wage.
Kasunod ito nang pag-apruba ng Regional Tripartite Wages and Productivity Board (RTWPB) Region II sa pagtaas ng sahod ng mga nasa non-agricultural workers sa P360 mula sa P340.
Samantala, makatatanggap ng minimum wage rate na P340 ang agriculture workers habang P320 para sa mga nagtatrabaho sa retail service establishment na mayroong 10 empleyado pababa.
Naipasa ang panukala dahil sa implementasyon ng Republic Act 6727 o Wage Rationalization, gayundin ang patuloy na pagtaas ng presyo ng mga bilihin.
Para sa mga kasambahay naman, P3,500 ang inilabas na minimun wage rate, pero maaari pa itong taasan ng kanilang employer depende sa nais nilang pasahod.
Kaya matapos ang pag-aprubang ito, hiling natin na sana sa paunang hakbang ng pamahalaan ay magtuluy-tuloy na ang pagbibigay nila ng tugon para sa mga nangangailangan nang sa gayun ay hindi na mamumroblema ang lahat ng empleyado sa kanilang suweldo na natatanggap buwan-buwan at kahit mag-umpisa man ito sa beinte pesos o mas mababa pa ay ayos na ‘yan kaysa naman walang mapala at hindi tayo makasabay sa agos ng buhay, malaking tulong na rin ito para sa panggastos natin, araw-araw.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments