Tax-free na health card premiums, huwag nang baguhin!
“MAGPAKATAO tayo at huwag tayong mandaya, pakiusap.” Panawagan natin ito sa BIR. Marami kasi sa ating mga empleyado ang binibigyan ng kani-kanyang kumpanya ng health cards. Malaking tulong ito para mapagaan ang pagpapagamot o pagpapaospital. Hindi biro ang gastusin dito kaya nakahihinga ang bulsa natin dahil sa health cards pero, nagulat tayo at nadismaya nang magpalabas ng memo ang Bureau of Internal Revenue (BIR) na takda na nilang buwisan ang health card premiums.
Hindi natin matanggap ang lohika nito. Unang-una, ang BIR ang nagpatupad sa batas na hindi papatawan ng buwis ang health cards. Ang ibig bang sabihin nito, kinokontra ng BIR ang sarili nitong batas na nilikha noong 1998 na nagsasabing mananatiling tax free ang premiums ng health card? Kailangan nilang linawin sa RA 10963 ang pagpapatupad ng kanilang memo.
Base sa nilalaman ng Revenue Memorandum Circular (RMC) 50-2018 (A7) ng nasabing kagawaran, ipapasok sa taxable benefits and bonuses ng empleyado ang health card premiums kahit tax-free na ang mga nabanggit na benepisyo na hindi lalampas sa kabuuang P90, 000.
Kahit isa-isahin natin ang mga pahina ng RA 10963, hindi natin makikita na dapat buwisan ang mga HMO o health card benefits.
Sa laki ng gastusin sa pagpapagamot at pagpapaospital, hindi makatao na buwisan pa ang mga benepisyo na nakatutulong nang malaki para pangalagaan ang kalusugan ng bawat pamilyang Pilipino. Ito na lang ang naaasahan natin, lalo na ng mga simpleng pamilya tapos pahihirapan pa sa buwis, makatuwiran ba ito?
Uulitin natin na sana, linawin agad ng BIR ang isyung ito dahil 13th month at bonus season na. Tiyak na maaapektuhan ang mga benepisyo ng ating mga manggagawa kung hindi ito mareresolba.
Isa tayo sa mga hindi tumigil sa pagsusulong sa tax-free bonuses hanggang sa maisabatas ito. Tinaasan na natin ang exemption para buo ang maiuuwing bonus ng mga empleyado sa kani-kanyang pamilya kaya sana, huwag na natin silang dayain.
Comments