Kung mayroong karapatan ang opisyales ng DENR na manghuli kahit walang warrant of arrest

DR. PERSIDA V. RUEDA-ACOSTA / MAGTANONG KAY ATTORNEY

Dear Chief Acosta,

Inutusan ang asawa kong putulin ang ilang bahagi ng puno ng acacia na malapit sa eskuwelahan. Ibinigay sa kanya ang mga troso upang magamit namin. Kinaumagahan, hinuli siya ng mga opisyal ng Department of Environment and Natural Resources (DENR) nang makita nila ang mga troso sa aming bakuran dahil wala raw kaming kaukulang permit para rito. May karapatan bang manghuli ang nasabing mga opisyal kahit wala silang warrant of arrest? — Jen

Dear Jen,

Para sa inyong kaalaman, ang batas na nakasasaklaw sa inyong katanungan ay ang Presidential Decree (PD) No. 705 o mas kilala sa tawag na Revised Forestry Code. Nakasaad sa Section 68 na:

“Section 68. Cutting, Gathering and/or Collecting Timber or Other Forest Products Without License. Any person who shall x x x possess timber or other forest products without legal documents as required under existing forest laws and regulations, shall be punished with the penalties imposed under Articles 309 and 310 of the Revised Penal Code: […]”

Samakatwid, pinarurusahan ng batas na ito ang sinumang may-ari o pinaniniwalaang nagmamay-ari ng mga troso na walang mga legal na dokumento o kaukulang permit. Nakasaad din sa Section 80 ng nasabing batas ang mga sumusunod:

“Section 80. Arrest; Institution of criminal actions. A forest officer or employee of the Bureau shall arrest even without warrant any person who has committed or is committing in his presence any of the offenses defined in this Chapter. He shall also seize and confiscate, in favor of the Government, the tools and equipment used in committing the offense, and the forest products cut, gathered or taken by the offender in the process of committing the offense. The arresting forest officer or employee shall thereafter deliver within six (6) hours from the time of arrest and seizure, the offender and the confiscated forest products, tools and equipment to, and file the proper complaint with, the appropriate official designated by law to conduct preliminary investigations and file informations in court.”

Kaugnay nito, pinapayagan o binibigyan ng kapangyarihan ang mga opisyal ng Department of Environment and Natural Resources (DENR) na arestuhin ang sinumang pinaniniwalaang lumabag sa batas na ito kahit na wala silang dalang “warrant of arrest”. Ito rin ay ipinaliwanag ng Kagalang-galang na Korte Suprema sa kaso ni Ma. Mimie Crescencio vs. People of the Philippines (GR No. 205015, November 19, 2014, Ponente: Honorable former Associate Justice Bienvenido L. Reyes).

Nawa ay nasagot namin ang inyong mga katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyong ibibigay. Mas mainam kung personal kayong sasangguni sa isang abogado.

Maraming salamat sa inyong patuloy na pagtitiwala.