Buntis na worried magpa-test para sa diabetes

SHANE M. LUDOVICE, M.D / SABI NI DOC

Dear Doc. Shane,

Ako ay 5 buwang bun­tis sa aking unang anak. Ang sabi ng doktor, sa pag­balik ko raw ay kailangan kong magpasuri upang mala­man kung ako ay may diabetes. Wala sa lahi namin ang diabetes ngu­nit, bakit kaila­ngan pa ito? — Eva

Sagot

Ayon sa International Diabetes Federation, isa sa bawat pitong buntis ang nagkakaroon ng diabetes habang sila ay nagdada­lantao (gestational diabetes). Ang gestational diabetes ay natutuklasan lamang habang ang babae ay buntis. Tuma­taas ang blood sugar habang buntis sa mga babaeng may gestational diabetes.

Ang mga batang ipapa­nganak ng mga babaeng may gestational diabetes ay mataas din ang tsansa na magkaroon ng diabetes sa kanilang paglaki. Kung hindi maaagapan ang diabetes ng ina habang ito ay buntis, ang bata sa sinapupunan ay nagi­ging overweight kaya tuma­taas ang peligro na magkaroon ang bata ng shoulder injury paglabas sa puwerta o mangailangan ng cesarean section para ma­iluwal ito.

Bakit kailangang mag­­pa-OGTT ang buntis?

Ang oral glucose tolerance test (OGTT) ay karani­wang pinagagawa sa mga buntis na nasa ikaanim hanggang ikapitong buwan ng pagdadalantao. Puwede rin itong ipagawa ng doktor nang mas maaga o kahit lagpas dito depende sa sitwasyon ng pasyente. Sa OGTT, malala­man kung may diabetes ng pagbu­buntis o gestational diabetes. Kung may gestational diabetes kasi ang buntis, nagiging labis ang timbang ng bata sa sinapupunan. Ang mga babaeng nagkaroon ng gestational diabetes noong sila ay buntis ay puwede ring magkaroon ng Type 2 diabetes sa susunod na mga taon kahit hindi na buntis. Dahil sa peligrong ito sa bata at sa ina, kailangang magpa-OGTT para malaman kung may gestational diabetes.

Pagkatapos manganak ay karaniwang nawawala ang gestational diabetes. Nagiging normal muli ang asukal sa dugo pero, minsan, ito ay nagtutuloy na agad sa Type 2 diabetes. Sa pamamagitan din ng OGTT, ang mga baba­eng nagkaroon ng gestational diabetes noong sila ay buntis ay dapat magpaulit ng OGTT anim na linggo pag­ka­tapos manganak para mala­man kung normal na bang muli ang kanilang asukal sa dugo.