Kasunduang ‘Pinas at China, huwag i-secret!
TROPANG DUTERTE, NAGHIHIMUTOK SA SURVEY NA ISINUSUKA NG MGA PINOY SI CHINESE PRES. XI JINPING —Naghihimutok sina Presidential Spokesman Salvador Panelo at DND Sec. Delfin Lorenzana sa survey ng SWS na mas malaki ang tiwala ng mga Pinoy sa Amerika kaysa sa China at hindi rin pabor ang ilan sa pagiging “nganga” ng Duterte gov’t. sa pagsakop ng China sa mga teritoryo ng Pilipinas sa West Philippine Sea (WPS).
May puntong maghimutok sina Panelo at Lorenzana kasi kung pagbabasehan ang survey ay lumalabas na ang naging bisita ni P-Duterte sa Pilipinas na si Chinese Pres. Xi Jinping ay isinusuka pala ng mga Pinoy, boom!
◘◘◘
PANIBAGONG ATAKE NI P-DUTERTE, CHURCH DIVERSIONARY TACTIC PARA SA UTANG AT JOINT EXPLORATION NG PILIPINAS AT CHINA—Nanawagan ang publiko kay P-Duterte na ilantad ang laman ng mga kasunduan nila ni Chinese Pres. Xi Jinping, lalo na sa isyu ng utang at joint exploration ng Pilipinas at China sa mga teritoryo ng bansa sa WPS, pero imbes tugunan ang kahilingan ng mamamayan, eh, ang ginawa ng pangulo ay sinabi na isang “Bishop David” daw ang nagnanakaw ng mga donasyon sa Simbahan.
Ang layo ng sagot! Malinaw na diversionary tactic ‘yan ni P-Duterte para ang pag-atake na naman niya sa Simbahan ang pag-usapan ng publiko at hindi ang mga laman ng kasunduan nila ni Chinese Pres. Xin Jinping, buwisit!
◘◘◘
PANG-12 NA LANG SA RANKINGS SI ANGARA, NAKUPO! —Unti-unti nang nalalaman ng publiko na si Sen. Sonny Angara ang kinasangkapan ni P-Duterte sa Senado sa TRAIN Law na nagpapahirap sa mamamayan dulot ng pagtaas ng presyo ng mga bilihin kasi base sa survey ng DZRH sa senatoriables ay ito ang rankings: 1. Cynthia Villar 2. Lito Lapid 3. Sen. Grace Poe 4. Sen. Pia Cayetano 5. Sen. Nancy Binay 6. Bong Revilla 7. Jinggoy Estrada 8. Bong Go 9. Koko Pimentel 10. Serge Osmeña 11. ‘Bato’ dela Rosa at pang-12 na lang sa rankings si Sen. Sonny Angara.
Ang masaklap, ang nakabuntot pa sa kanya ay ang malalakas ding kandidato na sina Mar Roxas (13); Gov. Imee Marcos (14) at Sen. JV Ejercito (15).
Ibig sabihin, tumatagilid na ang kandidatura ni Sen. Angara dahil sa kanyang TRAIN Law, period!
◘◘◘
MGA SCALAWAG, DOBLADO NA ANG SUWELDO, NANGHU-‘HULIDAP’ PA—Sinibak ni NCRPO Director General Guillermo Eleazar ang buong puwersa ng Las Piñas Police Anti-Drugs Unit dahil sa pangingikil sa kanilang mga hinuhuling sangkot sa droga.
Pambihira talaga ang mga scalawag na parak na ito, doblado na nga ang suweldo, ayaw pang maglubay sa raket nilang “hulidap”, mga pwe!
Comments