BULLPUPS KAHIT TALO, MAY TWICE-TO-BEAT; ADAMSON ENTRA SA SEMIS NG HS VOLLEY

GINULANTANG ng De La Salle-Zobel ang reigning girls champion National University nang wakasan nito ang win­ning run ng huli sa pa­mamagitan ng 25-18, 25-12, 18-25, 25-20 panalo sa UAAP Season 81 high school volleyball tourna­ment noong Miyerkules sa Blue Eagle Gym sa Quezon City.

Namuno si Alleiah Ma­laluan para sa Junior Lady Spikers sa itinala niyang 20 puntos, na ki­nabibilangan ng 7 ser­vice aces bukod pa sa 8 re­ceptions at 7 digs.

Nag-ambag si Justine Nazareno ng 10 puntos na may nakapaloob na 7 aces para sa DLSU-Zobel na umangat sa barahang 8-2, panalo-talo at nagbigay sa kanila ng playoff berth para sa twice-to-beat slot sa Final 4.

Pinangunahan ni Faith Nisperos ang nabigong Junior Lady Bullpups sa ipinoste ni­yang 14 pun­tos.

Sa kabila ng kabigu­an, sigurado na ang NU ng twice-to-beat incen­tive sa semis.

Sa isa pang laban, nag­poste si Kate Santiago ng 12 puntos upang pamu­nuan ang Adamson U sa pag-angkin ng 3rd semis berth sa pamamagitan ng 28-26, 28-26, 25-13 pa­nalo kontra UP Integrated School.

Dahil sa panalo, tu­maas ang Lady Falcons sa markang 7-3, panalo-talo, isang panalo na na­huhuli sa Junior Lady Spikers na mahigpit ni­lang kaagaw sa No. 2 seed sa Final 4.

Samantala, nakalapit ang UST sa susunod na round makaraan ang 25-21, 25-14, 25-23 panalo kontra UE. (VA)